ദിസ്പൂർ: സംസ്ഥാനത്തെ അദ്ധ്യാപകർക്ക് ഡ്രസ് കോഡ് നിർദേശിച്ച് അസം സർക്കാർ. അദ്ധ്യാപകർ ജീൻസും ലെഗിൻസും ധരിച്ച് ജോലിക്കെത്തുന്നത് പൂർണമായും ഒഴിവാക്കണമെന്ന് സർക്കാർ ഉത്തരവിറക്കി. ആൺ-പെൺ വ്യത്യാസമില്ലാതെ നിയമം എല്ലാ അദ്ധ്യാപകരും പാലിക്കണമെന്നാണ് നിർദേശം. ഡിപ്പാർട്ട്മെന്റ് ഓഫ് സ്കൂൾ എജുക്കേഷനാണ് ഉത്തരവ് പുറപ്പെടുവിച്ചിരിക്കുന്നത്. പുരുഷ അദ്ധ്യാപകർ ടീ-ഷർട്ട്, ജീൻസ് എന്നിവ ധരിച്ച് ഡ്യൂട്ടിക്ക് എത്തരുത്. വനിതാ അദ്ധ്യാപകർ ടീ-ഷർട്ട്, ജീൻസ്, ലെഗിൻസ് എന്നിവ ഒഴിവാക്കണമെന്നുമാണ് നിർദേശം.
വിദ്യാഭ്യാസ സ്ഥാപനങ്ങളിലെത്തുന്ന ചില അദ്ധ്യാപകർ അവർക്ക് ഇഷ്ടമുള്ള വസ്ത്രം ധരിക്കുന്നതായുള്ള ശീലം ശ്രദ്ധയിൽപ്പെട്ടിട്ടുണ്ട്. അദ്ധ്യാപകർ എല്ലാ കാര്യങ്ങളിലും വിദ്യാർത്ഥികൾക്ക് മാതൃകയാകണമെന്നാണ് പ്രതീക്ഷിക്കുന്നത്. പ്രത്യേകിച്ചും അവരുടെ കർത്തവ്യങ്ങൾ നിർവഹിക്കുന്ന സമയത്ത്. അതിനാൽ ജോലി സമയത്ത് മാന്യമായി വസ്ത്രം ധരിച്ച് എത്താനും പ്രൊഫണലിസം കൈവിടാത്ത ഡ്രസ് കോഡ് പാലിക്കാനും അദ്ധ്യാപകർ ശ്രദ്ധിക്കണമെന്ന് ഉത്തരവിൽ പറയുന്നു.
