ന്യൂഡൽഹി: ഹിമാലയൻ രാഷ്‌ട്രത്തിലേക്കുള്ള ഔദ്യോഗിക സന്ദർശനത്തിനായി പ്രധാനമന്ത്രി നരേന്ദ്രമോദിയെ ക്ഷണിച്ച് നേപ്പാൾ പ്രധാനമന്ത്രി പുഷ്പ കമാൽ ദഹൽ. പ്രധാനമന്ത്രിയെ നേപ്പാളിൽ സ്വാഗതം ചെയ്യാൻ കാത്തിരിക്കുകയാണെന്ന് അദ്ദേഹം പറഞ്ഞു. ഡൽഹിയിലെ ഹൈദരാബാദ് ഹൗസിൽ സംയുക്ത വാർത്താസമ്മേളനത്തിൽ സംസാരിക്കവെയാണ് അ്‌ദ്ദേഹം ഇക്കാര്യം വ്യക്തമാക്കിയത്.
‘ഇന്ത്യയും നേപ്പാളും തമ്മിലുള്ള ബന്ധം വളരെ കാലം പഴക്കമുള്ളതാണ്. പ്രധാനമന്ത്രി നരേന്ദ്രമോദിയുടെ നേതൃത്വത്തിൽ ഇന്ത്യയുടെ സമ്പദ്വ്യവസ്ഥയുടെയും രാഷ്‌ട്രീയ ഭൂപ്രകൃതിയുടെയും വളർച്ച കാണുന്നതിൽ നേപ്പാൾ സന്തുഷ്ടരാണ്. നേപ്പാൾ പ്രധാനമന്ത്രി എന്ന നിലയിൽ ഇത് എന്റെ നാലാമത്തെ ഇന്ത്യാ സന്ദർശനമാണ്. എന്റെ ഇതുവരെയുള്ള ഇന്ത്യാ സന്ദർശനം ഈ നിമിഷത്തിൽ സ്നേഹപൂർവ്വം ഓർക്കുന്നു. ഇന്ത്യയും നേപ്പാളും തമ്മിലുള്ള ബന്ധം സാംസ്‌കാരിക, സാമൂഹിക-സാമ്പത്തിക ബന്ധങ്ങളുടെ അടിത്തറയിലാണ് നിലകൊള്ളുന്നത്’ നേപ്പാൾ പ്രധാനമന്ത്രി ദഹൽ പറഞ്ഞു.
‘പ്രധാനമന്ത്രി നരേന്ദ്രമോദിയുമായി ഇരു രാജ്യങ്ങളുടെയും ഉഭയകക്ഷി ബന്ധത്തിലെ പുരോഗതിയെക്കുറിച്ച് വിപുലമായ അവലോകന യോഗം നടത്തി. വ്യാപാരം, ഗതാഗതം, നിക്ഷേപം, ജലവൈദ്യുത വികസനം, വൈദ്യുതി, ജലസേചനം, കൃഷി, റെയിൽവേ, പാലം, പൈപ്പ് ലൈൻ വിപുലീകരണം തുടങ്ങിയ വിവിധ മേഖലകളിലെ സഹകരണം കൂടുതൽ ശക്തിപ്പെടുത്തുന്നതിനുള്ള മാർഗങ്ങൾ ചർച്ച ചെയ്തു. അതിർത്തി വിഷയങ്ങളെ കുറിച്ച് ഞങ്ങൾ കൃത്യമായ ചർച്ചകൾ നടത്തിയിട്ടുണ്ട്. നേപ്പാളിൽ സംയുക്ത സംരംഭമായ വളം പ്ലാന്റ് സ്ഥാപിക്കുന്നതിനെ കുറിച്ചും ചർച്ച ചെയ്തു. പദ്ധതിയുടെ വിജയകരമായ പൂർത്തീകരണത്തിനായി ഒരുമിച്ച് പ്രവർത്തിക്കാൻ ഇരു രാജ്യങ്ങളും പരമാവധി ശ്രമിക്കും. ഇന്ത്യ നേപ്പാളിന്റെ ഏറ്റവും അടുത്ത അയൽരാജ്യവും വികസനത്തിന്റെയും സമൃദ്ധിയുടെയും പ്രധാന പങ്കാളിയുമാണ്’എന്നും അദ്ദേഹം വ്യക്തമാക്കി.
