ചെന്നൈ: വീണ്ടും കാട് മാറ്റി മുണ്ടൻതുറൈ കടുവാ സങ്കേതത്തിൽ തുറന്നുവിട്ട അരിക്കൊമ്പൻ ആരോഗ്യവാനെന്ന് തമിഴ്നാട് വനംവകുപ്പ്. തുറന്നു വിട്ടതിന് ശേഷമുള്ള ആദ്യ വീഡിയോ പങ്കുവെച്ചാണ് വനംവകുപ്പ് ഇക്കാര്യം സ്ഥിരീകരിച്ചത്. മണിമുത്താർ ഡാം സൈറ്റിൽ അരിക്കൊമ്പൻ വെള്ളം കുടിക്കുന്നതിന്റെയും തീറ്റയെടുക്കുന്നതിന്റെയും വീഡിയോയാണ് പങ്കുവെച്ചിരിക്കുന്നത്.
തമിഴ്നാട് വനം പരിസ്ഥിതി വകുപ്പ് അഡീഷണൽ ചീഫ് സെക്രട്ടറി സുപ്രിയ സാഹുവാണ് വീഡിയോ പങ്കുവെച്ചത്. ട്വിറ്ററിലൂടെയാണ് വീഡിയോ പുറത്തുവിട്ടത്. ആനയെ നിരീക്ഷിക്കാൻ നിയോഗിച്ച വനം വകുപ്പ് ഉദ്യോഗസ്ഥരാണ് വീഡിയോ പകർത്തിയത്.
കമ്പം ജനവാസ മേഖലയിൽ ഇറങ്ങി ഭീകരാന്തരീക്ഷം സൃഷ്ടിച്ചതിനെ തുടർന്നാണ് അരിക്കൊമ്പനെ മയക്കുവെടി വെച്ച് തമിഴ്നാട് വനംവകുപ്പ് വീണ്ടും കാട് മാറ്റിയത്. തെക്കൻ കേരളത്തിലെ നെയ്യാർ, ശെന്തുരുണി വനമേഖലയോട് ചേർന്ന് കിടക്കുന്ന അപ്പർ കോതയാർ വനമേഖലയിലാണ് ആനയെ തുറന്നുവിട്ടത്. മതിയായ ചികിത്സ നൽകിയ ശേഷമാണ് വനമേഖലയിലേയ്ക്ക് ആനയെ തുറന്നു വിട്ടത്.
Comments