വിശ്വാസികൾക്കും വിനോദസഞ്ചാരികൾക്കും ഒരുപോലെ ഇഷ്ടപ്പെട്ട സ്ഥലമാണ് കാശി. പലരും പോകാൻ കൊതിക്കുന്ന പുണ്യഭൂമി. വിശ്വാസത്തിന്റെയും ഭക്തിയുടെയും മണ്ണിലേക്ക് കുറഞ്ഞ ചെലവിലൊരു യാത്ര പോയാലോ? അതും ട്രെയിനിൽ…വിമാനത്തിലുള്ള യാത്രയോ വമ്പൻ ഹോട്ടലിലെ താമസമോ ആഗ്രഹിക്കാതെ വളരെ ചെറിയ ചെലവിൽ കാശിയ്‌ക്ക് പോയി വരാൻ ഇന്ത്യൻ റെയിൽവേ സുവർണാവസരം ഒരുക്കുന്നു. വെറും 940 രൂപയ്‌ക്ക് പോകാവുന്നതാണ്! കേരളത്തിൽ നിന്നും വാരണാസി വഴി പോകുന്ന ഏക ഡയറക്ട് ട്രെയിനായ എറണാകുളം-പാട്‌ന സൂപ്പർഫാസ്റ്റ് എക്‌സ്പ്രസാണ് ഇതിന് അവസരമൊരുക്കുന്നത്.
എറണാകുളത്ത് നിന്ന് യാത്ര ആരംഭിച്ച് 28 സ്റ്റേഷനുകളിൽ നിർത്തി 2,821 കിലോമീറ്റർ സഞ്ചരിച്ച് നാലാമത്തെ ദിവസമാണ് ട്രെയിൻ വാരണാസി ജംഗ്ഷനിലെത്തി ചേരുന്നത്. എല്ലാ ശനിയാഴ്ചയും എറണാകുളം ജംഗ്ഷൻ റെയിൽവേ സ്റ്റേഷനിൽ നിന്നും രാത്രി 11.55-ന് പുറപ്പെടുന്ന ട്രെയിൻ 49 മണിക്കൂർ 50 മിനിറ്റ് സമയം സഞ്ചരിച്ച് ചൊവ്വാഴ്ച പുലർച്ചെ 1.45-ന് വാരണാസിയിലെത്തും.
കേരളത്തിൽ നാല് സ്റ്റോപ്പുകളാണുള്ളത്. എറണാകുളം ജംഗ്ഷനിൽ ശനിയാഴ്ച രാത്രി 11.55, ആലുവയിൽ ഞായറാഴ്ച പുലർച്ചെ 12.23, തൃശൂർ പുലർച്ചെ 1.47 , പാലക്കാട് പുലർച്ചെ 3.07 എന്നിങ്ങനെയാണ് സമയം. തുടർന്ന് തമിഴ്‌നാട്, ആന്ധ്രാ പ്രദേശ്, തെലുങ്കാന, മഹാരാഷ്‌ട്ര, മദ്ധ്യപ്രദേശ്, ഉത്തർപ്രദേശ് എന്നീ സംസ്ഥാനങ്ങളിലൂടെ സഞ്ചരിച്ച് ലക്ഷ്യസ്ഥാനമായ പാട്‌നയിൽ നാലാം ദിനം പുലർച്ചെ 6.25-നാണ് എത്തിച്ചേരുക. തിരികെ എല്ലാ ചൊവ്വാഴ്ചയും വാരണാസിയിൽ നിന്നും ട്രെയിൻ കേരളത്തിലേക്ക് യാത്ര തിരിക്കുന്നു. തുടർന്ന് വ്യാഴാഴ്ച രാത്രി 9.40-ന് എറണാകുളം ജംഗ്ഷനിലെത്തും.
സ്ലീപ്പർ, എസി ത്രീ ടയർ, എസി 2 ടയർ എന്നിങ്ങനെ മൂന്ന് തരത്തിലുള്ള ക്ലാസുകളാണ് ലഭിക്കുക. സ്ലീപ്പർ കേച്ചിൽ 940 രൂപ, എസി ത്രീ ടയറിൽ 2,420 രൂപ, എസി ടു ടയറിൽ 3,535 രൂപ എന്നിങ്ങനെയാണ് ട്രെയിൻ ടിക്കറ്റ് നിരക്ക്.
കാശി വിശ്വനാഥ ക്ഷേത്രം, മണികർണിക ഘട്ട്, ഗംഗയിലൂടെയുള്ള ബോട്ടിംഗ്, അസി ഘട്ടിൽ നിന്ന് രണ്ട് കിലോമീറ്റർ അകലെയുള്ള ബനറാസ് ഹിന്ദു യൂണിവേഴ്‌സിറ്റി, ബിന്ദു മാധവ ക്ഷേത്രം, കൊറിയൻ ക്ഷേത്രം, പിങ്ക് ബുദ്ധ ക്ഷേത്രം, നന്ദേശ്വർ ക്ഷേത്രം തുടങ്ങിയ പുണ്യസ്ഥലങ്ങളിൽ സഞ്ചാരികൾക്ക് സന്ദർശിക്കാവുന്നതാണ്.
