ഗജിനി എന്ന തമിഴ് ചിത്രത്തിലെ കൽപന എന്ന ഒറ്റക്കഥാപാത്രത്തിലൂടെ ദക്ഷിണേന്ത്യയുടെ മുഴുവൻ ഹൃദയം കവർന്ന നടിയാണ് അസിൻ. തമിഴ്, തെലുങ്ക് സിനിമകളിലേക്ക് കടന്നതോടെ അസിൻ തിരക്കേറിയ നായിക നടിയായി. പിന്നീട് ചിത്രം ബോളിവുഡിലേക്ക് റീമേക്ക് ചെയ്യപ്പെട്ടതോടെ അസിന്റെ ജനപ്രീതി പതിന്മടങ്ങായി വർധിച്ചു. മലയാളിയായ താരം നരേന്ദ്രൻ മകൻ ജയകാന്തൻ വക എന്ന മലയാള സിനിമയിൽ മാത്രമേ അഭിനയിച്ചിട്ടുള്ളൂ. എന്നാൽ 2016ൽ വിവാഹം നടന്നതിന് പിന്നാലെ അഭിനയത്തോട് വിട പറയുകയായിരുന്നു.
കഴിഞ്ഞ കുറേ വർഷങ്ങളായി സോഷ്യൽ മീഡിയയിൽ തന്റെ ഫോട്ടോ പോലും പങ്കുവെക്കാറില്ല. ഭർത്താവിനും മകൾക്കുമൊപ്പമുള്ള സ്വകാര്യ ജീവിതത്തിനാണ് അസിൻ ഇന്ന് പ്രാധാന്യം നൽകുന്നത്. എന്നാൽ പിന്നീട് സമൂഹമാദ്ധ്യമത്തിൽ താരമെത്തി. നിലവിൽ ഭർത്താവ് രാഹുലിനൊപ്പം വേനലവധിക്കാലം ആഘോഷിക്കുകയാണെന്ന് അസിൻ ഇൻസ്റ്റഗ്രാം സ്റ്റോറിയിലൂടെ വ്യക്തമാക്കിയത്. എന്നാൽ ഇപ്പോഴിതാ അസിനെക്കുറിച്ച് തമിഴ് സിനിമാ രംഗത്തെ മാധ്യമപ്രവർത്തകൻ ചെയ്യാറു ബാലു പറഞ്ഞ വാക്കുകളാണിപ്പോൾ ശ്രദ്ധ നേടുന്നത്.
സാധാരണയായി നടിമാർക്കൊപ്പം അമ്മയാണ് സെറ്റിൽ ഒപ്പം വരാറെങ്കിൽ അസിനൊപ്പം നടിയുടെ പിതാവാണ് വന്നിരുന്നതെന്ന് ഇദ്ദേഹം പറയുന്നു. അസിന്റെ സിനിമകളുടെ കഥ കേട്ടിരുന്നത് അച്ഛനാണെന്നും സില്ലിനൊരു കാതൽ എന്ന സിനിമയിൽ ഭൂമിക ചെയ്ത വേഷം അസിൻ നിരസിച്ചതിനെക്കുറിച്ചും ചെയ്യാറു ബാലു വെളിപ്പെടുത്തി. സൂര്യയാണ് അസിനെ നായികയായി നിർദ്ദേശിച്ചത്. എന്നാൽ ജ്യോതികയുടെ കഥാപാത്രമാണെങ്കിൽ എന്റെ മകൾ ചെയ്യാം. സെക്കന്റ് ഹീറോയിനായ ഈ കഥാപാത്രം വേണ്ടെന്ന് അസിന്റെ പിതാവ് പറയുകയായിരുന്നു. ഈ തീരുമാനത്തിൽ സൂര്യ നിരാശനായി. തുടർന്ന് അസിന് പകരമാണ് ഭൂമിക സിനിമയിലെത്തുന്നത്. പിന്നീട് സിനിമ ഇറങ്ങിയ ശേഷം ഈ കഥാപാത്രം നഷ്ടപ്പെട്ടല്ലോ എന്നോർത്ത് അസിൻ വിഷമിച്ചതായും ഇദ്ദേഹം പറഞ്ഞു.
ഇതുകൂടാതെ ബില്ല എന്ന സിനിമയിൽ അജിത്ത് അസിനെ നായികയാക്കാൻ നിർദ്ദേശിച്ചിരുന്നു. അസിന്റെ ഫോട്ടോ ഷൂട്ടുകൾ നടത്തി. ഇതിൽ പ്രധാനപ്പെട്ട ഒരു ഫോട്ടോഷൂട്ടിൽ ബിക്കിനി ധരിക്കേണ്ടിയിരുന്നു. എന്നാൽ അത് പറ്റില്ലെന്ന് അസിന്റെ പിതാവ് പറയുകയും അങ്ങനെയാണ് ആ സിനിമ നയൻതാരയ്ക്ക് ലഭിക്കുന്നതെന്നും ബാലു ഓർത്തു.
അന്ന് ഒരു സിനിമയിലും ശരീരപ്രദർശനത്തിന് അസിൻ തയ്യറായിരുന്നില്ല. മറ്റ് നടികളെ പോലെ അസിൻ കഷ്ടപ്പെട്ട് അവസരങ്ങൾ തേടി വന്ന ആളല്ല. ധനിക കുടുംബത്തിലായതിനാൽ പണത്തിന് വലിയ പ്രാധാന്യം ഇല്ലായിരുന്നു. വേണമെങ്കിൽ പത്ത് കമ്പനി അവർക്ക് നടത്താം. ഭർത്താവും ധനികനാണ്. വിവാഹശേഷം എന്തിനാണ് ഇനി അഭിനയിക്കുന്നതെന്ന് അസിന് തോന്നിയിരിക്കാം എന്നും ചെയ്യാറു ബാലു അഭിപ്രായപ്പെട്ടു.
മൈക്രോമാക്സിന്റെ സഹസ്ഥാപകനായ രാഹുലുമായി 2016ലായിരുന്നു അസിന്റെ വിവാഹം. 2017ൽ അരിൻ എന്ന മകളും അവർക്കുണ്ടായി. സിനിമാ രംഗം പൂർണമായും വിടുകയാണെന്ന് പറഞ്ഞ അസിനെ പിന്നീട് സിനിമാതാരങ്ങളുടെ ആഘോഷങ്ങളിലോ മറ്റോ കണ്ടിട്ടില്ല. പാപ്പരാസികളുടെ ശ്രദ്ധയിൽ പെടാതിരിക്കാനും ശ്രദ്ധിക്കുന്നു. ഒടുവിലായി അഭിനയിച്ച ഓൾ ഈസ് വെൽ എന്ന ചിത്രം 2015ലായിരുന്നു പുറത്തിറങ്ങിയത്.
