ന്യൂഡൽഹി: ജൂലൈ 2 അന്താരാഷ്ട്ര ബിരിയാണിദിനമാണ്. ഇതിനോടനുബന്ധിച്ച് പുതിയ കണക്കുകൾ പുറത്തുവിട്ടിരിക്കുകയാണ് സ്വിഗ്ഗി. ഇന്ത്യാക്കാരുടെ ഇഷ്ട ആഹാരം ബിരിയാണിയെന്ന കണ്ടെത്തലുമായാണ് ഓൺലൈൻ ഭക്ഷണ വിതരണക്കരായ സ്വിഗ്ഗി എത്തിയിരിക്കുന്നത്. തങ്ങൾക്ക് വരുന്ന ബിരിയാണികളുടെ ഓഡറുകളുടെ കണക്കാണ് സ്വിഗ്ഗി പുറത്തു വിട്ടിരിക്കുന്നത്.
കഴിഞ്ഞ 12 മാസത്തിനിടെ 7.6 കോടി ബിരിയാണി ഓർഡറുകൾ ഇന്ത്യക്കാർ നൽകിയതായി സ്വിഗ്ഗി വെളിപ്പെടുത്തി. 2023 ജനുവരി മുതൽ 2023 ജൂൺ 15 വരെയുള്ള ഓർഡറുകളെ കുറിച്ചുള്ള സ്വിഗ്ഗിയുടെ കണക്കുകളിൽ 8.26 ശതമാനം വളർച്ചയുണ്ടായതായി കമ്പനി പറയുന്നു. ഇന്ത്യയിൽ ആകമാനം ബിരിയാണി വിൽക്കുന്ന 2.6 ലക്ഷം റെസ്റ്റോറന്റുകളും 28000-ഓളം മറ്റു റെസ്റ്റോറന്റുകളുമാണ് ഉള്ളത്.
നല്ല സുഗന്ധമുള്ള ലഖ്നോവി ബിരിയാണി മുതൽ എരിവുള്ള ഹൈദരാബാദി ദം ബിരിയാണി വരെയും രുചികരമായ കൊൽക്കത്ത ബിരിയാണി മുതൽ സുഗന്ധമുള്ള മലബാർ ബിരിയാണി വരെയും ആളുകളുടെ പ്രിയപ്പെട്ട ബിരിയാണിയാണ്്. ഇന്ത്യയിൽ ഒരു മിനിട്ടിൽ 219 ഓഡറുകൾ വരെ ഉണ്ടാകാറുണ്ടെന്ന് സ്വിഗ്ഗി പറയുന്നു.
