മലപ്പുറം: സ്കൂൾ ബസിൽ സൈക്കിൾ ഇടിച്ച് അപകടത്തിൽപ്പെട്ട വിദ്യാർത്ഥി അത്ഭുതകരമായി രക്ഷപ്പെട്ടു. അപകടത്തിൽ വിദ്യാർത്ഥിയ്ക്ക് സാരമായി പരിക്കേറ്റു. നിലമ്പൂർ കരുളായി സ്വദേശി ആതിഥിനാണ് (14) പരിക്കേറ്റത്. ഇന്നലെ വൈകുന്നേരം കുട്ടി സ്കൂൾവിട്ടുവരുന്നതിനിടെയാണ് അപകടത്തിൽപ്പെട്ടത്. സൈക്കിളിൽ വരികയായിരുന്ന വിദ്യാർത്ഥി കരുളായിൽ എത്തിയപ്പോഴാണ് സ്കൂൾ ബസുമായി കൂട്ടിയിടിച്ചത്.
അപകടത്തിന്റെ സിസിടിവി ദൃശ്യങ്ങൾ സോഷ്യൽ മീഡിയയിൽ പ്രചരിക്കുകയാണ്. ദൃശ്യങ്ങളിൽ വിദ്യാർത്ഥി ഓടിച്ചിരുന്ന സൈക്കിൾ സ്കൂൾ ബസിൽ ഇടിക്കുന്നത് വ്യക്തമാണ്. ഇടിയുടെ ആഘാതത്തിൽ കുട്ടി ബസിനടിയിൽപ്പെടുകയായിരുന്നു. ഇടിച്ചതിന് പിന്നാലെ ബസ് നിർത്തിയതിനാൽ വലിയൊരു അപകടം ഒഴിവാക്കാൻ സാധിച്ചു.
ശബ്ദം കേട്ടെത്തിയ സമീപവാസികൾ ഉടൻ തന്നെ വിദ്യാർത്ഥിയെ സമീപത്തുള്ള ആശുപത്രിയിൽ പ്രവേശിപ്പിക്കുകയായിരുന്നു. കുട്ടി കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലാണ്.
Comments