ന്യൂഡൽഹി: യുകെയിലെ ഇന്ത്യൻ ഹൈക്കമ്മീഷന്റെയും നയതന്ത്രജ്ഞർക്കെതിരെയുമുണ്ടാകുന്ന തീവ്രവാദ ഭീഷണിക്കെതിരെ നടപടി സ്വീകരിക്കാൻ ബ്രിട്ടീഷ് സുരക്ഷാ ഉപദേഷ്ടാവ് ടിം ബാരോയോട് ആവശ്യപ്പെട്ട് ദേശീയ സുരക്ഷാ ഉപദേഷ്ടാവ് അജിത് ഡോവൽ. നിലവിൽ ഇന്ത്യാ സന്ദർശനത്തിലുള്ള ബാരോയുമായി നടത്തിയ വിപുലമായ ചർച്ചയിലായിരുന്നു ഡോവൽ ഇക്കാര്യം വ്യക്തമാക്കിയത്. രണ്ട് ദിവസം മുൻപ് സാൻഫ്രാൻസിസ്കോയിലെ ഇന്ത്യൻ കോൺസുലേറ്റിന് തീയിടുകയും നയതന്ത്രജ്ഞ ഉദ്യോഗസ്ഥർക്ക് നേരെയുണ്ടായ ഭീഷണിയുമാണ് ഇക്കാര്യം ചർച്ചയിൽ ഉന്നയിക്കാനുള്ള കാരണം.
ഇരു രാജ്യങ്ങളും തമ്മിലുള്ള ഉഭയകക്ഷി, പ്രാദേശിക, ആഗോള അജണ്ട എന്നിവയെക്കുറിച്ചും ചർച്ച ചെയ്തിരുന്നു. ഭീകരതയ്‌ക്കെതിരെ പ്രവർത്തിക്കുന്നതിനെക്കുറിച്ചും ഇരു നേതാക്കളും സംസാരിച്ചു. അജിത് ഡോവലിന്റെ ക്ഷണ പ്രകാരമാണ് ടിം ബാരോ ഇന്ത്യ സന്ദർശനത്തിനെത്തിയത്. യുകെയിലെ മുതിർന്ന ഉദ്യോഗസ്ഥരുടെ പ്രതിനിധി സംഘവും അദ്ദേഹത്തിനൊപ്പം ഉണ്ടായിരുന്നു.
തീവ്രവാദത്തെ നേരിടാൻ ഇന്ത്യ-യുകെ സഹകരണം വർദ്ധിപ്പിക്കുമെന്നും ഇരു നേതാക്കളും കൂടിക്കാഴ്ചയിൽ ചർച്ച ചെയ്തു. ഇരുവരുടെയും ചർച്ചകൾക്ക് ശേഷം പ്രതിനിധി ചർച്ചകളും നടന്നു. ഇരു രാജ്യങ്ങളും തങ്ങളുടെ അടുത്ത തന്ത്രപരമായ പങ്കാളിത്തം പുനഃസ്ഥാപിക്കുകയും സുരക്ഷാ ബന്ധങ്ങൾ കൂടുതൽ മെച്ചപ്പെടുത്തുന്നതിനെക്കുറിച്ചും സംസാരിച്ചു.
സുരക്ഷാ ഉപദേഷ്ടാവ് അജിത് ഡോവലുമായുള്ള കൂടികാഴ്ചയ്‌ക്ക് ശേഷം നിരവധി ഉദ്യോഗസ്ഥരുമായി സംവദിച്ചിട്ടാകും ബ്രിട്ടീഷ് സുരക്ഷാ ഉപദേഷ്ടാവ് ടിം ബാരോയുടെ മടക്കം. ഇന്ത്യൻ നയതന്ത്രജ്ഞരുടെയും അവരുടെ ദൗത്യങ്ങളുടെയും സുരക്ഷ ഉറപ്പാക്കാൻ രാജ്യങ്ങളോട് ഇന്ത്യ ഇതിനകം ആവശ്യപ്പെട്ടിട്ടുണ്ട്.
