കൊല്ലം: വീടിന് മുകളിൽ ടെറസിൽ കഞ്ചാവ് ചെടി വളർത്തിയ യുവാവ് അറസ്റ്റിൽ. ഇരവിപുരം വാളത്തുംഗൽ ആക്കോലിൽ എആർഎ 61-ൽ അനന്ദു രവിയാണ് എക്സൈസ് എൻഫോഴ്സ്മെന്റ് ആൻഡ് നാർകോട്ടിക് സ്പെഷ്യൽ സ്ക്വാഡിന്റെ പിടിയിലായത്.
യുവാവ് മൺകലത്തിൽ നട്ടുവളർത്തിയ കഞ്ചാവ് ചെടിയ്ക്ക് രണ്ട് മാസത്തോളം വളർച്ചയുണ്ട്. സ്ഥിരമായി കഞ്ചാവ് ഉപയോഗിച്ചിരുന്ന ആളാണ് പ്രതിയെന്നും ഇത് ലഭിക്കാതെ വരുന്ന സാഹചര്യങ്ങളിൽ ഉപയോഗിക്കുന്നതിനാണ് കഞ്ചാവ് ചെടി നട്ടു വളർത്തിയതെന്നും അനന്ദു എക്സൈസിനോട് സമ്മതിച്ചു.
രാത്രികാലങ്ങളിൽ അനന്ദുവിന്റെ വീടിന് മുകളിലെത്തി യുവാക്കൾ കഞ്ചാവ് ഉപയോഗിച്ചിരുന്നുവെന്ന് ഉദ്യോഗസ്ഥർക്ക് വിവരം ലഭിച്ചിരുന്നു. ഇതേ തുടർന്ന് അനന്ദുവിന്റെ വീട്ടിൽ നടത്തിയ തിരച്ചിലിൽ ആണ് ടെറസിൽ നിന്നും മൺകലത്തിൽ നട്ടുവളർത്തിയ നിലയിൽ കഞ്ചാവ് ചെടി കണ്ടെത്തിയത്. സംഭവത്തിൽ ഇവിടെയെത്തി കഞ്ചാവ് ഉപയോഗിച്ചിരുന്ന യുവാക്കളെ കുറിച്ച് അന്വേഷിച്ച് വരികയാണെന്നും എക്സൈസ് ഉദ്യോഗസ്ഥർ വ്യക്തമാക്കി.
Comments