ബിജെപിയുടെ താര മുഖങ്ങളാണ് സുരേഷ് ഗോപിയും കൃഷ്ണകുമാറും. അഭിനയ ജീവിതത്തിനപ്പുറം കൃത്യമായ രാഷ്ട്രീയ കാഴ്ചപ്പാടുകളുള്ള രണ്ട് നടന്മാർ. സിനിമയിലും രാഷ്ട്രീയത്തിലും ശോഭിക്കുന്നതിനൊപ്പം തന്നെ സാമൂഹ്യ പ്രവർത്തനങ്ങളിലും സജീവമായി ഇരുവരും ഇടപെടാറുണ്ട്. മക്കളുടെ പേരിൽ ഇരു നടന്മാരും സന്നദ്ധപ്രവർത്തനങ്ങൾ ചെയ്തു വരുന്നു. ഇപ്പോഴിതാ, സുരേഷ് ഗോപി തനിക്ക് പ്രചോദനമാണെന്ന് തുറന്നു പറയുകയാണ് നടൻ കൃഷ്ണകുമാർ. രാഷ്ട്രീയത്തിനപ്പുറം സാമൂഹ്യ സേവനത്തെപ്പറ്റിയാണ് സുരേഷ് ഗോപി ചിന്തിക്കുന്നതെന്നും പാർട്ടിക്കതീതമായ ഒരു മുഖം അദ്ദേഹത്തിനുണ്ടെന്നും കൃഷ്ണകുമാർ പറയുന്നു.
സുരേഷ് ഗോപിയേയും എന്നെയും താരതമ്യം പോലും ചെയ്യാൻ പറ്റില്ല. രാഷ്ട്രീയത്തിലാണെങ്കിലും സിനിമയിലാണെങ്കിലും അനുഭവം കൊണ്ടാണെങ്കിലും സാമൂഹ്യ സേവനത്തിലാണെങ്കിലും സുരേഷ് ഗോപി വലിയ ഉയരത്തിലാണ്. അദ്ദേഹവുമായി നല്ല സൗഹൃദത്തിലാണ് ഞാൻ. സിനിമ ചെയ്യുന്നതിനൊപ്പം തന്നെ തൃശൂരിൽ എല്ലാവിധത്തിലും അദ്ദേഹം പ്രവർത്തിക്കുന്നുണ്ട്. അതുകൊണ്ട് തന്നെ അദ്ദേഹം വളരെ തിരക്കുള്ള ഒരു മനുഷ്യനാണ്. അതിനാൽ അടുത്തിടെയായി സുരേഷ് ഗോപിയെ കാണാൻ എനിക്ക് കഴിഞ്ഞിട്ടില്ല.
ഡൽഹിയിൽ പോകുന്ന സമയത്ത് സുരേഷ് ഗോപിയുടെ ഫ്ലാറ്റിലാണ് ഞാൻ താമസിച്ചിരുന്നത്. ധാരാളം കാര്യങ്ങൾ ഞങ്ങൾ തമ്മിൽ സംസാരിക്കും. രാഷ്ട്രീയത്തിനപ്പുറം അദ്ദേഹം സംസാരിക്കുന്നത് സമൂഹ്യ സേവനത്തെപ്പറ്റിയാണ്. പല കാര്യങ്ങളും ചെയ്യാൻ എനിക്ക് സുരേഷേട്ടൻ നിർദ്ദേശം നൽകാറുണ്ട്. സാമൂഹ്യ സേവനം ചെയ്യാൻ പാർട്ടിയുടെ പ്ലാറ്റ്ഫോം തന്നെ ഉപയോഗിക്കണമെന്നില്ല. അദ്ദേഹം ഒരാളെപ്പറ്റിയും എന്റെ അടുത്ത് പരാതി പറഞ്ഞിട്ടില്ല. ബിജെപി സംസ്ഥാന അദ്ധ്യക്ഷൻ കെ.സുരേന്ദ്രനെ വിളിച്ച് ഒരു കാര്യം അദ്ദേഹം പറഞ്ഞാൽ അത് സുരേന്ദ്രൻ തള്ളിക്കളയില്ല. അദ്ദേഹം ആവശ്യപ്പെടുന്നത് ചെയ്തിരിക്കും.
പാർട്ടിക്ക് അതീതമായ ഒരു മുഖം സുരേഷ് ഗോപിക്കുണ്ട്. അദ്ദേഹം എല്ലാവർക്കും പ്രചോദനമാണ്. സുരേഷേട്ടൻ ചെയ്യുന്ന രീതിയിൽ സാമൂഹ്യ പ്രവർത്തനം ചെയ്യണമെന്ന് നമുക്ക് എല്ലാവർക്കും തോന്നിപോകും. രാഷ്ട്രീയത്തിനപ്പുറം സുരേഷേട്ടനായും രാധികയുമായും വളരെ അടുപ്പമാണ് എനിക്കും എന്റെ കുടുംബത്തിനുമുള്ളത്. രാധികയും ഞാനും ദൂരദർശനിൽ ഒരേ കാലയളവിൽ ഉണ്ടായിരുന്നു. സുരേഷേട്ടനേക്കാൾ മുമ്പ് എനിക്ക് രാധികയെ അറിയാം. കുടുംബ കാര്യങ്ങളാണ് ഞങ്ങൾ കൂടുതൽ സംസാരിക്കുന്നത്. സുരേഷേട്ടനുമായി രാഷ്ട്രീയം സംസാരിക്കണം എന്നാണ് എന്റെ ആഗ്രഹം- കൃഷ്ണകുമാർ പറഞ്ഞു.
Comments