ജീത്തു ജോസഫ് മോഹൻലാൽ കൂട്ടുകെട്ടിൽ പിറക്കുന്ന ചിത്രങ്ങൾക്ക് ആരാധകർ കൂടുതലാണ്. അതിന്റെ ഏറ്റവും വലിയ ഉദാഹരണമാണ് ദൃശ്യം സീരീസുകൾ. ചിത്രത്തിന്റെ മൂന്നാം പതിപ്പിനായി ആരാധകർ കാത്തിരിക്കുമ്പോഴാണ് ഇരുവരും ഒരുമിക്കുന്ന പുതിയ ചിത്രത്തിന്റെ പ്രഖ്യാപനം. നിലവിൽ മോഹൻലാൽ ജീത്തു ജോസഫ് കൂട്ടുകെട്ടിൽ ഒരുങ്ങുന്ന ‘റാം’മിന്റെ അവസാനഘട്ട ചിത്രീകരണം പുരോഗമിക്കുകയാണ്.
എന്നാൽ പുതിയ ചിത്രത്തിന്റെ അപ്‌ഡേഷൻ വലിയ ആശയക്കുഴപ്പമാണ് ആരാധകർക്കിടയിൽ സൃഷ്ടിച്ചിരിക്കുന്നത്. ചിത്രത്തിന്റെ പ്രഖ്യാപന പോസ്റ്ററിൽ പ്രൊഡക്ഷൻ നമ്പർ 33 എന്ന് ചേർത്തിട്ടുണ്ട്. ആശിർവാദ് സിനിമാസിന്റെ 33-ാം ചിത്രം കൂടിയാണ് ഇത്. എന്നാൽ ആരാധകർ ചോദ്യമുയർത്തുന്നത് ദൃശ്യം 3- ന്റെ പ്രഖ്യാപനമാണോ എന്നതരത്തിലാണ്. നേരത്തെ, ദൃശ്യം 3 പരിഗണനയിലാണെന്ന സൂചന സംവിധായകൻ തന്നെ നൽകിയിരുന്നു.
എന്നാൽ പുതിയ ചിത്രം ദൃശ്യം 3 അല്ലെന്നാണ് പുറത്ത് വരുന്ന വിവരം. പുതിയ സിനിമയുടെ ചിത്രീകരണം ഓഗസ്റ്റിൽ ആരംഭിക്കുമെന്നാണ് അണിയറപ്രവർത്തകർ അറിയിച്ചത്. ദൃശ്യം, ദൃശ്യം 2, ട്വൽത്ത് മാൻ, റാം എന്നിവയാണ് മോഹൻലാലും ജീത്തു ജോസഫും ഒന്നിച്ച മറ്റ് ചിത്രങ്ങൾ. രണ്ട് ഭാഗങ്ങളിലായാണ് റാം ഒരുങ്ങുന്നത്. ആദ്യഭാഗം ഈ വർഷം ഓണം റിലീസ് ആയി തിയേറ്ററിൽ എത്തുമെന്നാണ് റിപ്പോർട്ട്.
