ജനിച്ചു വീഴുന്ന ഏതൊരു കുഞ്ഞും ആദ്യം നുകരുക സ്വന്തം അമ്മയുടെ മുലപ്പാലാണ്. അമ്മയുടെ പാലാണ് ഒരു കുഞ്ഞിന് വളരാനുള്ള അടിസ്ഥാന ഘടകം. എന്നാൽ ഒന്നോ രണ്ടോ പ്രസവം കഴിഞ്ഞ അമ്മമാരിൽ ചിലപ്പോൾ പാൽ കുറവ് വന്നേക്കാം. അങ്ങനെയുള്ള സാഹചര്യത്തിൽ രണ്ട് കുട്ടികളുടെ അമ്മ ആയിരത്തിലധികം കുഞ്ഞുങ്ങൾക്ക് മുലപ്പാലൂട്ടി ഗിന്നസ് റെക്കോർഡിട്ടാൽ എങ്ങനെയുണ്ടാകും..?
യുണൈറ്റഡ് സ്‌റ്റേറ്റ്‌സിലെ അലോഹയിൽ താമസിക്കുന്ന രണ്ട് കുഞ്ഞുങ്ങളുടെ അമ്മയായ എലിസബത്ത് ആൻഡർസൺ-സൈറയാണ് ആയിരത്തിലധികം കുട്ടികൾക്ക് മുലപ്പാൽ നൽകി ഗിന്നസ് റെക്കോർഡിൽ ഇടം നേടിയത്. 2015 ഫെബ്രുവരി 20നും 2018 ജൂൺ 20നും ഇടയിലായി 1,599.68 ലിറ്റർ മുലപ്പാലാണ്, എലിസബത്ത് മുലപ്പാൽ ബാങ്കിലേയ്‌ക്ക് നൽകിയത്.
മുലപ്പാൽ ഉൽപ്പാദിപ്പിക്കാൻ സഹായിക്കുന്ന പ്രൊലാക്റ്റിൻ എന്ന ഹോർമോണിന്റെ അമിത ഉൽപ്പാദനമാണ് എലിസബത്തിൽ മുലപ്പാൽ വർദ്ധിക്കാനുള്ള കാരണം. ഈ അവസ്ഥയെ ‘ഹൈപ്പർലാക്‌ടേഷൻ’ എന്നാണ് അറിയപ്പെടുന്നത്. പമ്പിംഗ് ഉപകരണം ഉപയാഗിച്ചാണ് പാൽ നീക്കം ചെയ്യുന്നതെന്നും തന്റെ ഈ അവസ്ഥ നിരവധി കുഞ്ഞുങ്ങൾക്ക് പുതു ജീവൻ നൽകിയെന്നും എലിസബത്ത് പറയുന്നു. പ്രസവ സമയത്ത് അമ്മ മരിച്ച് പോയ കുഞ്ഞുങ്ങൾക്ക് മുലപ്പാലൂട്ടാൻ തനിക്ക് കഴിയുന്നുണ്ടെന്നും രണ്ട് കുട്ടികളുടെ അമ്മ കൂടിയായ എലിസബത്ത് കൂട്ടിച്ചേർത്തു. അതേസമയം മുലപ്പാൽ ബാങ്കിലേയ്‌ക്ക് 350,000 ഔൺസാണ് ഈ അമ്മ നൽകിരിക്കുന്നത്
