വർഷങ്ങൾക്ക് മുൻപ് ഇറങ്ങിയ പല സിനിമകളും എത്ര കണ്ടാലും മതിവരില്ല. അത്തരം സിനിമകൾ പിൽക്കാലത്ത് റീ റിലീസ് ചെയ്യാറുണ്ട്. തിയറ്റർ എക്സ്പീരിയൻസ് വീണ്ടും കിട്ടുന്നതിനുവേണ്ടിയാണ് പ്രധാനമായും റീ റിലീസുകൾ നടത്തുന്നത്. രജനികാന്തിന്റെയും കമൽഹാസന്റെയും ചിത്രങ്ങൾക്ക് പുറമേ മലയാള താരങ്ങളുടെ ചിത്രങ്ങളും പ്രദർശനത്തിന് എത്താറുണ്ട്. മലയാളത്തിൽ ഒടുവിൽ റീ റിലീസ് ചെയ്ത ചിത്രമാണ് സ്ഫടികം. ഇത്തരത്തിൽ റീറിലീസ് ചെയ്യുന്ന ചിത്രങ്ങൾ വൻ കളക്ഷൻ നേടാറുമുണ്ട്.
ഇപ്പോഴിതാ ഒരു സിനിമ കൂടി റീ റിലീസിന് ഒരുങ്ങുകയാണ്. 2008-ൽ സൂര്യ നായകനായി പുറത്തിറങ്ങിയ വാരണം ആയിരമാണ് റിലീസിന് തയ്യാറെടുക്കുന്നത്. ചിത്രം റിലീസ് ചെയ്ത് പതിനഞ്ച് വർഷം തികയുമ്പോഴാണ് റീറിലീസിന് തയ്യാറെടുക്കുന്നത്. ചിത്രത്തിന്റെ തെലുങ്ക് പതിപ്പാണ് റിലീസിനെത്തുക. ഇന്ത്യയ്‌ക്ക് പുറമെ യുഎസിലും ചിത്രം റിലീസ് ചെയ്യും.
സൂര്യ സൺ ഓഫ് കൃഷ്ണൻ എന്ന പേരിലാണ് ചിത്രം റീറിലീസ് ചെയ്യുക. ചിത്രം ജൂലൈ 19-ന് യുഎസിലും 21-ന് ഇന്ത്യയിലും പ്രദർശനത്തിനെത്തും. തമിഴിലെ എക്കാലത്തെയും മികച്ച റൊമാൻറിക് ഫീൽ ഗുഡ് ചിത്രമാണ് വാരണം ആയിരം. റീറിലീസ് പതിപ്പിന് 3.12 മിനിറ്റ് ദൈർഘ്യമുള്ള ഒരു ട്രെയിലറും അണിയറക്കാർ പുറത്തിറക്കിയിട്ടുണ്ട്.
