തിരുവനന്തപുരം: മുൻ മുഖ്യമന്ത്രിയും മുതിർന്ന കോൺഗ്രസ് നേതാവുമായിരുന്ന ഉമ്മൻ ചാണ്ടിയുടെ നിര്യാണത്തിൽ അനുശോചിച്ച് സംസ്ഥാനത്ത് ഇന്ന് പൊതു അവധി പ്രഖ്യാപിച്ചു. മൂന്ന് ദിവസമാണ് സംസ്ഥാനത്ത് ഔദ്യോഗിക ദുഃഖാചരണം. വിദ്യാഭ്യാസ സ്ഥാപനങ്ങൾക്കും സർക്കാർ ഓഫീസുകൾക്കും ഇന്ന് അവധിയായിരിക്കും. ഇന്ന് നടത്താൻ നിശ്ചയിച്ച പി.എസ്.സി.പരീക്ഷകൾക്ക് മാറ്റമില്ല. ഇന്ന് നടക്കേണ്ടുന്ന സർട്ടിഫിക്കറ്റ് വേരിഫിക്കേഷൻ മറ്റൊരു ദിവസത്തേക്ക് മാറ്റി വെച്ചു. ആരോഗ്യ, കാലിക്കറ്റ്, കുസാറ്റ്, സാങ്കേതിക, ശ്രീശങ്കരാചാര്യ സംസ്‌കൃത സർവകലാശാലകൾ ഇന്ന് നടത്താൻ നിശ്ചയിച്ചിരുന്ന എല്ലാ പരീക്ഷകളും മാറ്റിവെച്ചു.
അതേസമയം ഇന്ന് ഹെലികോപ്റ്റർ മാർഗം തിരുവനന്തപുരത്ത് എത്തിക്കുന്ന മൃതദേഹം കെപിസിസി ഹാളിലും ദർബാർ ഹാളിലും പൊതുദർശനത്തിന് വയ്‌ക്കും. സംസ്‌കാര ചടങ്ങുകൾ നാളെ പുതുപ്പളളിയിൽ നടക്കുമെന്നാണ് വിവരം. പുതുപ്പളളിയെന്ന കൊച്ചുഗ്രാമത്തിൽ നിന്ന് കേരള രാഷ്‌ട്രീയത്തിലേക്ക് ഉയർന്നുവന്ന കോൺഗ്രസ് നേതാവായിരുന്നു ഉമ്മൻ ചാണ്ടി. ക്യാൻസർ രോഗബാധിതനായി ബെംഗളൂരുവിലെ ചിന്മയാ മിഷൻ ആശുപത്രിയിൽ ചികിത്സയിലിരിക്കെയായിരുന്നു വിയോഗം.
