തിരുവനന്തപുരം: പ്രധാനമന്ത്രി നരേന്ദ്രമോദി ഇസ്ലാമിക രാജ്യങ്ങൾക്കു നൽകുന്ന സവിശേഷ പരിഗണനയിൽ അഭിനന്ദനവുമായി കോൺഗ്രസ് നേതാവും തിരുവനന്തപുരം എംപിയുമായ ശശി തരൂർ. മുസ്ലീം രാജ്യങ്ങളുമായി നിലവിൽ ഇന്ത്യയ്ക്ക് എക്കാലത്തേക്കാളും മികച്ച ബന്ധമാണ് ഉള്ളതെന്നും അദ്ദേഹം പറഞ്ഞു. സിഎൻഎൻ–ന്യൂസ് 18 കോൺക്ലേവിൽ സംസാരിക്കുകയായിരുന്നു അദ്ദേഹം.
ഒരു നിമിഷത്തെ തോന്നലിലാണെങ്കിൽക്കൂടി ശശി തരൂർ ഒടുവിൽ സത്യം പറഞ്ഞിരിക്കുന്നു എന്നായിരുന്നു ബിജെപി ഐടി സെൽ അദ്ധ്യക്ഷൻ അമിത് മാളവ്യയുടെ പ്രതികരണം. ഇസ്ലാമിക രാജ്യങ്ങളിലേക്കു കൂടി എത്താൻ മോദി കാണിച്ച താൽപര്യം അനുകരണീയമാണ്. ഇതിലും മികച്ച രീതിയിൽ ഈ വിഷയം കൈകാര്യം ചെയ്യാനാകില്ല. പ്രധാനപ്പെട്ട മുസ്ലിം രാജ്യങ്ങളുമായുള്ള നമ്മുടെ ബന്ധം ഇപ്പോൾ എക്കാലത്തേക്കാളും മെച്ചപ്പെട്ടു. ഇക്കാര്യത്തിൽ ഞാൻ മുൻപ് ഉന്നയിച്ചിരുന്ന വിമർശനങ്ങൾ ഏറ്റവും സന്തോഷത്തോടെ തന്നെ പിൻവലിക്കുന്നു എന്നായിരുന്നു തരൂരിന്റെ വാക്കുകൾ.
