മലപ്പുറം: അപകടക്കെണിയായി എടവണ്ണ-കൊയിലാണ്ടി സംസ്ഥാനപാതയിലെ ഓടത്തെരുവ് വളവിലെ മാടാമ്പുറം. സ്വകാര്യ ബസ് വലിയ അപകടത്തിൽ നിന്നും രക്ഷപ്പെട്ടത് തലനാരിഴയ്ക്കാണ്. ഓടത്തെരുവ് വളവിലെ മാടാമ്പുറത്ത് ഇന്നലെ സ്വകാര്യ ബസ് നിയന്ത്രണം വിട്ട് സംസ്ഥാനപാതയിലുടെ തെന്നി നീങ്ങുകയായിരുന്നു. എന്നാൽ മറ്റു വാഹനങ്ങളുമായി കൂട്ടിയിടിക്കാതെ വലിയ അപകടം ഒഴിവായി.
അതേസമയം ബസ് അപകടത്തിൽപെടുന്നതിന് മണിക്കൂറുകൾക്ക് മുമ്പ് പിക്കപ്പ് വാഹനവും ഇവിടെ റോഡിൽ നിന്നും തെന്നി മാറിയിരുന്നു. കഴിഞ്ഞ രണ്ടാഴ്ചയ്ക്കിടെ മാത്രം ഏഴ് തവണ വാഹനങ്ങൾ അപകടത്തിൽപെട്ടിട്ടുണ്ട്. പിക്കപ്പ് വാൻ ഇടിച്ച് സ്കൂട്ടർ യാത്രികന് പരിക്കേറ്റതും മിനിവാൻ ബൈക്ക് യാത്രികനെ ഇടിച്ച് തെറിപ്പിച്ചതും ദിവസങ്ങൾക്ക് മുമ്പാണ്.
കൊടും വളവും ഇറക്കവും ഒരു വശത്ത് കൊക്കയുമൊക്കെയുള്ള ഭാഗമാണിത്. സ്ഥിരം അപകടക്കെണിയായിരുന്ന പാത വീതി കൂട്ടി നവീകരിച്ചതിന് പിന്നാലെയാണ് വാഹനങ്ങൾ തെന്നി മറിയാൻ തുടങ്ങിയത്. മഴ പെയ്ത് നനഞ്ഞ് കിടക്കുമ്പോഴാണ് കൂടുതൽ അപകടങ്ങൾ സംഭവിക്കുന്നത്. അപകടങ്ങൾ വർദ്ധിച്ചതോടെ നാട്ടുകാർ കഴിഞ്ഞ ദിവസം റോഡ് ഉപരോധിച്ചിരുന്നു. വാഹനങ്ങളുടെ അമിത വേഗതയും അശാസ്ത്രീയമായ റോഡ് നിർമ്മാണവുമാണ് അപകട കാരണമായി ചൂണ്ടിക്കാണിക്കപ്പെടുന്നത്.
Comments