രാജ്യത്തിന്റെ അഭിമാനദൗത്യമായ ചന്ദ്രയാൻ-3യുടെ വിക്ഷേപണം കഴിഞ്ഞ ദിവസമാണ് വിജയകരമായി നടന്നത്. ഇന്ത്യയുടെ ശാസ്ത്ര സാങ്കേതിക മേഖലയിലെ പ്രതീക്ഷയാണ് ചന്ദ്രയാൻ-3. ഇതിനാൽ തന്നെ രാജ്യത്തുടനീളം വിക്ഷേപണ വിജയത്തിന് പിന്നാലെ വിജയാഘോഷങ്ങൾ നടന്നു. അത്തരത്തിലൊരു വിജയാഘോഷ വീഡിയോ ആണ് ഇപ്പോൾ സമൂഹമാദ്ധ്യമങ്ങളിൽ ശ്രദ്ധേയമാകുന്നത്. ചന്ദ്രയാൻ-3യുടെ വിക്ഷേപണ വിജയം, ദൗത്യ സംഘത്തിന് പിന്നിൽ പ്രയത്നിച്ചവർ തുടങ്ങിയവർക്കായുള്ള ആദരസൂചകമായി റസ്റ്റോറന്റ് ജീവനക്കാർ സമർപ്പിച്ച ആഘോഷമാണ് വൈറലായിരിക്കുന്നത്. റസ്റ്റോറന്റ് ജീവനക്കാർ ചേർന്ന് ആദരസൂചകമായി റോക്കറ്റ് ദോശ ഉണ്ടാക്കുകയായിരുന്നു. ചന്ദ്രയാൻ ദോശ എന്നായിരുന്നു ഇവർ ഈ റോക്കറ്റ് ദോശയ്ക്ക് പേരിട്ടത്.
റസ്റ്റോറന്റിൽ എത്തിയ പെൺകുട്ടിയ്ക്ക് ഷെഫ് അഭിമാനപൂർവ്വം ചന്ദ്രയാൻ ദോശ നൽകുന്നതിന്റെ ദൃശ്യങ്ങളാണ് വീഡിയോയിൽ ഉള്ളത്. ദോശ കിട്ടിയ പെൺകുട്ടി സന്തോഷത്തോടെ ഇത് നോക്കി കാണുന്നതും കഴിക്കുന്നതും വീഡിയോയിൽ ദൃശ്യമാണ്. ഒരു ബഹിരാകാശ പേടകത്തിന് സമാന രീതിയിലാണ് ദോശയുള്ളത്. സാധാരണ ദോശയേക്കാൾ പതിന്മടങ്ങ് വലിപ്പത്തിലാണ് ഈ ദോശ. ചന്ദ്രയാൻ-3യുടെ വിക്ഷേപണ വിജയത്തിന്റെ ആഘോഷത്തിന് എന്ന അടിക്കുറിപ്പോട് കൂടിയാണ് ചന്ദ്രയാൻ ദോശയുടെ വീഡിയോ ട്വിറ്ററിൽ പങ്കുവെച്ചത്.
ഇതിനൊപ്പം തന്നെ ദൗത്യത്തിൽ ഒപ്പമുണ്ടായിരുന്നവരുടെ പ്രയത്നത്തിൽ അഭിനന്ദനവും അറിയിച്ചിട്ടുണ്ട്. സമൂഹമാദ്ധ്യമങ്ങളിൽ വൈറലായ ഈ ദോശ ഇതിനോടകം തന്നെ ലക്ഷക്കണക്കിന് ആളുകളാണ് കണ്ടു കഴിഞ്ഞിരിക്കുന്നത്. ചന്ദ്രയാൻ ദോശ കഴിക്കണമെന്നും വിജയാഘോഷത്തിൽ പങ്കാളികൾ ആകണമെന്നതും ഉൾപ്പെടെ നിരവധി കമന്റുകളാണ് ആളുകൾ പങ്കുവെച്ചിരിക്കുന്നത്.
