ന്യൂഡൽഹി: കോൺഗ്രസ് നേതാവ് രാഹുലിനെക്കുറിച്ച് പലപ്പോഴും വാചാലരാണ് അമ്മ സോണിയയും സഹോദരി പ്രിയങ്കയും. കഴിഞ്ഞ ദിവസം സോണിയയെ കണ്ട ഹരിയാനയിലെ ചില വനിതാ കർഷകർ രാഹുലിന്റെ വിവാഹക്കാര്യം ആരാഞ്ഞിരുന്നു. എന്തുകൊണ്ട് നിങ്ങൾക്ക് തന്നെ വധുവിനെ കണ്ടെത്തി തരാൻ കഴിയില്ല, എന്നായിരുന്നു ഇതിന് സോണിയ നൽകിയ മറുപടി.
ഇപ്പോഴിതാ ആർക്കായിരുന്നു കൂടുതൽ കുറുമ്പെന്ന സ്ത്രീകളുടെ ചോദ്യത്തിനാണ് പ്രിയങ്ക മറുപടി നൽകിയിരിക്കുന്നത്. കാണുമ്പോൾ ഓമനയായി തോന്നുമെങ്കിലും രാഹുലിനായിരുന്നു കുറുമ്പ് കൂടുതൽ എന്ന് പ്രിയങ്ക മറുപടി നൽകി. അവന്റെ കുറുമ്പുകൾക്ക് അമ്മ ശകാരിച്ചിരുന്നത് തന്നെ ആയിരുന്നുവെന്നും പ്രിയങ്ക പരാതി പറഞ്ഞു. ഹരിയാനയിലെ വനിതാ കർഷകരോടായിരുന്നു പാർട്ടി ജനറൽ സെക്രട്ടറിയുടെ മറുപടി.
സോണിയയുടെ വസതിയിൽ നടന്ന ഉച്ചഭക്ഷണ വിരുന്നിനിടെയാണ് സംഭവം. അടുത്തിടെ ഹരിയാന സന്ദർശിച്ച രാഹുൽ സ്ത്രീകളെ ഉച്ചഭക്ഷണത്തിനായി ക്ഷണിച്ചിരുന്നു. ഡൽഹിക്കടുത്ത് താമസിച്ചിട്ടും ഇതുവരെ തലസ്ഥാനം കണ്ടിട്ടില്ലെന്ന് അവർ പരാതി പറഞ്ഞപ്പോഴായിരുന്നു രാഹുലിന്റെ ക്ഷണം.
