22-കാരനായ ഗുജറാത്തി നടൻ ദേവ് ജോഷിയും കേരളത്തിലെ സംരംഭകനായ സന്തോഷ് ജോർജ്ജ് കുളങ്ങരയും ബഹിരാകാശ യാത്രയ്ക്കൊരുങ്ങുന്നു. ബഹിരാകാശ യാത്ര നടത്തിയ ആദ്യ ഇന്ത്യൻ പൗരനായ രാകേഷ് ശർമ്മയുടെ പാത പിന്തുടരാനൊരുങ്ങുകയാണ് ഇരുവരും. ഐഎസ്ആർഒയുടെ മനുഷ്യനെ ബഹിരാകാശത്തേക്ക് അയക്കാനൊരുങ്ങുന്ന ഗഗൻയാൻ ദൗത്യം പുരോഗമിച്ചുകൊണ്ടരിക്കുകയാണ്. ഇതിന്റെ ഭാഗമായ നാല് ബഹിരാകാശ യാത്രികർക്ക് പരിശീലനം നൽകി വരികയാണ്. ഐഎസ്ആർഒയുടെ ഗഗൻയാൻ ദൗത്യത്തിന് മുമ്പ് തന്നെ ഇരുവരും ബഹിരാകാശ നിലയത്തിലേക്ക് കുതിച്ചേക്കാം.
പ്രശസ്ത ഫാന്റസി ടെലിവിഷൻ പരമ്പരയായ ബാൽ വീറിലെ പ്രധാന നടനാണ് ജോഷി. ഇലോൺ മസ്കിന്റെ സ്പേസ് എക്സ് വികസിപ്പിച്ച സ്പേസ്ക്രാഫ്റ്റ് സ്റ്റാർഷിപ്പിലാകും ആറ് ദിവസം ജോഷി ഭ്രമണപഥത്തിൽ സഞ്ചരിക്കുക. എന്നാൽ സന്തോഷ് ജോർജ് കുളങ്ങരയുടെ പക്കലുള്ളത് റിച്ചാർഡ് ബ്രാൻഡിന്റെ വിർജിൻ അറ്റ്ലാന്റിക് എന്ന കപ്പലിൽ നിന്നും ബഹിരാകാശത്തേക്ക് പറക്കുന്നതിനുള്ള ടിക്കറ്റാണ്. ഇത് അദ്ദേഹത്തെ ആദ്യ ബഹിരാകാശ സഞ്ചാരികളിൽ ഒരാളാക്കി മാറ്റും.
ഏപ്രിൽ 20-ന് നടത്തിയ പരീക്ഷണ പറക്കൽ പരാജയപ്പെട്ടിരുന്നു. തുടർന്ന് സ്പേസ് എക്സ് അതിന്റെ സ്റ്റാർഷിപ്പ് സൂപ്പർഹെവി വാഹനത്തിന്റെ പുതിയ പതിപ്പായ ബൂസ്റ്റർ-9 ഇക്കഴിഞ്ഞ ജൂലൈ 20-ന് പുറത്തിറക്കി. സൗത്ത് ടെക്സസിലെ സ്റ്റാർബേസ് ഫെസിലിറ്റി ലോഞ്ച്പാഡിലാണ് പുറത്തിറക്കിയത്. ആറ് മുതൽ എട്ട് ആഴ്ചയ്ക്കുള്ളിൽ കുതിപ്പുണ്ടാകുമെന്നാണ് മസ്ക് വ്യക്തമാക്കിയിരിക്കുന്നത്.
ജൂലൈ 17-ന് വിർജിൻ ഗാലക്റ്റിക് ആദ്യ മൂന്ന് യാത്രികരുടെ പട്ടിക പുറത്തിറക്കിയതിൽ സന്തോഷ് ജോർജ് കുളങ്ങരയുടെ പേരും ഉൾപ്പെട്ടിരിക്കുന്നു. ഓഗസ്റ്റിൽ നടക്കാനിരിക്കുന്ന ആദ്യ സ്വകാര്യ ബഹിരാകാശ യാത്രിക ദൗത്യത്തിന്റെ ഭാഗമായിരിക്കും മൂവർ സംഘം. 2007-ൽ വിർജിൻ ഗാലക്റ്റിക്സുമായി യാത്ര ബുക്ക് ചെയ്ത ബഹിരാകാശ സഞ്ചാരികളുടെ ആദ്യ ബാച്ചിന്റെ ഭാഗമാണ് ഇദ്ദേഹം.
