തിരുവനന്തപുരം: ഗണപതി ഭഗവാനെ അധിക്ഷേപിച്ച് പരാമർശം നടത്തിയ സ്പീക്കർ എ എൻ ഷംസീറിനെതിരെ പ്രതിഷേധം ശക്തമാകുന്നതിനിടെ പ്രതികരണവുമായി നടനും മുൻ എംപിയുമായ സുരേഷ് ഗോപി. താങ്കളുടെ മിത്ത് എന്റെ സത്യമാണെന്ന് അദ്ദേഹം പറഞ്ഞു. ആരേയും ഇന്നുവരെ ദ്രോഹിച്ചിട്ടില്ലാത്ത, കളങ്കമില്ലാത്ത, വഞ്ചനയും ദ്രോഹവും ചെയ്യാത്ത സർവ്വസത്യമാണെന്നും സുരേഷ് ഗോപി കൂട്ടിച്ചേർത്തു. സമൂഹമാദ്ധ്യമത്തിലൂടെയാണ് അദ്ദേഹം പ്രതികരിച്ചത്. തന്റെ വീട്ടിലുള്ള ഗണപതി ഭഗവാന്റെ ചിത്രങ്ങളും താരം സമൂഹമാദ്ധ്യമത്തിൽ പോസ്റ്റ് ചെയ്ത കുറിപ്പിനൊപ്പം പങ്കുവെച്ചു.
‘താങ്കളുടെ മിത്ത് എന്റെ സത്യം.
ആരേയും ഇന്നുവരെ ദ്രോഹിച്ചിട്ടില്ലാത്ത, കളങ്കമില്ലാത്ത, വഞ്ചനയും ദ്രോഹവും ചെയ്യാത്ത സർവ്വസത്യം.
എന്റെ വീട്ടിലെ എന്റെ സത്യം
ഞങ്ങളുടെ ജീവിതത്തിലെ ഞങ്ങളുടെ സത്യം
കോടികണക്കിന് മനുഷ്യരുടെ സത്യം ??’- സുരേഷ് ഗോപി പറഞ്ഞു.
അതെസമയം സ്പീക്കർ എ.എൻ ഷംസീർ നടത്തിയ ഹിന്ദുവിരുദ്ധ പരാമർശത്തിനെതിരെ പ്രതിഷേധം ഇപ്പോഴും ആളിക്കത്തുകയാണ്. എ.എൻ ഷംസീറിനെതിരെ പ്രതിഷേധം ശക്തമാക്കാനൊരുങ്ങിയിരിക്കുകയാണ് യുവജന സംഘടനകൾ.
നിയമസഭാ സമ്മേളനം നടക്കുന്ന ഇന്ന് സ്പീക്കറിനെതിരെ യുവമോർച്ച നിയമസഭയിലേക്ക് മാർച്ച് നടത്തും. ഈ വിഷയത്തിൽ നിയമസഭയ്ക്ക് ഉള്ളിലും കോൺഗ്രസ് പ്രതിഷേധം അറിയിക്കും. വരും ദിവസങ്ങളിൽ സഭയ്ക്ക് പുറത്ത് ശക്തമായ പ്രതിഷേധം സംഘടിപ്പിക്കാനാണ് ഹിന്ദു സംഘടനകളുടേയും ബിജെപിയുടെയും തീരുമാനം.
