ന്യൂഡൽഹി: സ്പൈസ് ജെറ്റ് വിമാനത്തിൽ സഹയാത്രികയോടും വിമാന ജീവനക്കാരിയോടും അപമര്യാദയായി പെരുമാറിയ സംഭവത്തിൽ ഇടപ്പെട്ട് വനിതാ കമ്മീഷൻ. കഴിഞ്ഞ ബുധനാഴ്ച മുംബൈ വിമാനത്തിലാണ് സംഭവം നടന്നത്. വിമാനത്തിൽ സ്ത്രീകളെ അപമാനിക്കുന്ന തരത്തിലുള്ള വിഡിയോ സാമൂഹ്യമാദ്ധ്യമങ്ങളിൽ പ്രചരിച്ചതിന് പിന്നാലെയാണ് നടപടിയുമായി വനിതാ കമ്മീഷൻ രംഗത്തെത്തിയത്.
വിമാനത്തിലെ വനിതാ ജീവനക്കാരിയുടെയും യാത്രക്കാരിയുടെയും ചിത്രങ്ങളാണ് മോശമായ രീതിയിൽ യാത്രക്കാരൻ പകർത്തിയത്. ഡൽഹി വനിതാ കമ്മിഷൻ അദ്ധ്യക്ഷ സ്വാതി മാലിവാൾ സ്ത്രീകളെ അപമാനിച്ചുവെന്ന് ചൂണ്ടിക്കാട്ടി ഇയാൾക്കെതിരെ നടപടി ആവശ്യപ്പെട്ട് നോട്ടീസ് നൽകി. ഡൽഹി പോലീസിനും ഡയറക്ടറേറ്റ് ജനറൽ ഓഫ് ഏവിയേഷനുമാണ് കമ്മീഷൻ നോട്ടിസ് നൽകിയത്. പ്രതിയ്ക്കെതിരെ സ്വീകരിച്ച നടപടിയുടെ വിശദവിവരങ്ങൾ നൽകണമെന്നും കമ്മീഷൻ പോലീസിനോട് ആവശ്യപ്പെട്ടു. സംഭവത്തിൽ വനിതാ കമ്മീഷൻ സ്വമേധയാ കേസെടുത്തിട്ടുണ്ട്. ഓഗസ്റ്റ് 23-നുള്ളിൽ വിശദമായ റിപ്പോർട്ട് നൽകണമെന്നും കമ്മീഷൻ ആവശ്യപ്പെട്ടു.
ഡൽഹിയിൽ നിന്ന് മുംബൈയിലേക്കുള്ള സ്പൈസ് ജെറ്റ് വിമാനത്തിലാണ് സംഭവമുണ്ടായത്.
യാത്രക്കാരൻ വിമാനത്തിലെ ജീവനക്കാരിയുടെയും സഹയാത്രിയുടെയും ചിത്രങ്ങളെടുത്തെന്ന് മറ്റ് യാത്രക്കാർ ആരോപിച്ചു. തുടർന്ന് ഇയാളുടെ മൊബൈൽ ഫോൺ പരിശോധിച്ചപ്പോൾ സ്ത്രീകളുടെ ചിത്രങ്ങൾ മോശമായ രീതിയിൽ പകർത്തിയതായി കണ്ടെത്തുകയായിരുന്നു.
Comments