ന്യൂഡൽഹി: 69-മത് ദേശീയ ചലച്ചിത്ര പുരസ്കാരങ്ങൾ ഇന്ന് പ്രഖ്യാപിക്കും. വൈകിട്ട് അഞ്ചിന് ഡൽഹിയിൽ കേന്ദ്ര മന്ത്രി അനുരാഗ് ഠാക്കൂർ പുരസ്കാരങ്ങൾ പ്രഖ്യാപിക്കും. 2021ൽ റിലീസ് ചെയ്ത ചിത്രങ്ങളാണ് പുരസ്കാരത്തിനായി പരിഗണിക്കുന്നത്. വിവിധ വിഭാഗങ്ങളിലായി മലയാള സിനിമകളും പുരസ്കാരത്തിനായി മാറ്റുരയ്ക്കുന്നുണ്ട്.
മലയാളത്തിലെ മികച്ച സിനിമയാകാനുളള പട്ടികയിൽ നായാട്ട് , മിന്നൽ മുരളി , മേപ്പടിയാൻ, ഹോം തുടങ്ങിയ ചിത്രങ്ങൾ പരിഗണനയിലുണ്ടെന്നാണ് സൂചന. നായാട്ട് എന്ന ചിത്രത്തിലെ അഭിനയത്തിന് ജോജു ജോർജ്, ആർക്കറിയാം എന്ന ചിത്രത്തിലെ അഭിനയത്തിന് ബിജു മേനോനും, ഹോമിലെ അഭിനയത്തിന് ഇന്ദ്രൻസ് ഉൾപ്പെടെയുളളവർ മികച്ച നടനുള്ള സാധ്യത പട്ടികയിൽ ഉൾപ്പെട്ടിട്ടുണ്ടെന്നാണ് വിവരം. ആർ മാധവൻ സംവിധാനം ചെയ്ത് അഭിനയിച്ച റോക്കട്രി മികച്ച നടനടക്കമുളള വിവധ വിഭാഗങ്ങളിൽ മത്സരത്തിലുണ്ട്.
ഗംഗുഭായ് കത്തിയവാഡി എന്ന ചിത്രത്തിലെ അഭിനയത്തിന് ആലിയ ഭട്ടും, തലൈവി എന്ന ചിത്രത്തിലെ പ്രകടനത്തിന് കങ്കണ റണാവത്തും മികച്ച നടിക്കുളള അവാർഡിനായി മത്സരരംഗത്തുണ്ട്.
ഓസ്കാർ പുരസ്കാരം നേടിയ ആർആർആറിലെ സംഗീതത്തിന് കീരവാണിക്ക് മികച്ച സംഗീത സംവിധാനത്തിനുള്ള അവാർഡ് സാധ്യത പട്ടികയിലുണ്ട്. 68-മത് ദേശീയ ചലച്ചിത്ര പുരസ്കാരത്തിൽ 8 അവാർഡുകളാണ് മലയാള സിനിമയെ തേടിയെത്തിയത്. അപർണ ബാലമുരളി മികച്ച നടിയായപ്പോൾ ബിജു മേനോൻ മികച്ച സഹനടനുളള അവാർഡ് സ്വന്തമാക്കിയിരുന്നു.
Comments