ബുഡാപെസ്റ്റ്: കഴിഞ്ഞ ലോക അത്ലറ്റിക് ചാമ്പ്യന്ഷിപ്പിലെ വെള്ളി ഇത്തവണ പൊന്നാക്കി ചരിത്രം രചിച്ച് നീരജ് ചോപ്ര. ടോക്കിയോ ഒളിമ്പിക്സിന് പിന്നാലെയാണ് താരം രാജ്യത്തിനായി സ്വര്ണം നേടുന്നത്. മെഡല് നേട്ടത്തോടെ ലോക അത്ലറ്റിക്സ് ചാമ്പ്യന്ഷിപ്പില് സ്വര്ണം നേടുന്ന ആദ്യ ഇന്ത്യന് താരമെന്ന റെക്കോര്ഡും നീരജ് സ്വന്തം പേരില് ചരിത്ര താളുകളില് എഴുതി ചേര്ത്തു.
കലാശ പോരില് ഫൗള്ത്രോയോടെ തുടങ്ങിയ താരം ഇന്ത്യന് ആരാധകരെ ചെറുതായി ഒന്ന് പേടിപ്പിച്ചെങ്കിലും തൊട്ടടുത്ത ശ്രമം രാജ്യത്തെ 140 കോടി ജനങ്ങളുടെ സ്വപ്നവും നിറവേറ്റുന്നതായിരുന്നു. 88.17 മീറ്റര് ദൂരം താണ്ടിയാണ് താരം ഒന്നാം സ്ഥാനം അരക്കിട്ട് ഉറപ്പിച്ചത്.
വെള്ളിമെഡല് ജേതാവും പാകിസ്താന് താരവുമായ അര്ഷദ് നദീമിന് ഒരിക്കല്പ്പോലും ഇന്ത്യന് താരത്തിന്റെ അടുത്തെത്തനായില്ല.87.82 മീറ്റര് എറിഞ്ഞാണ് നദീം വെള്ളി സ്വന്തമാക്കിയത്. നീരജിന്റെ മൂന്നാം ത്രോ 86.32 മീറ്റും നാലാം ത്രോ 84.64 മീറ്ററും കലാശ പോരിലെ അഞ്ചാമത്തേതും അവസാനത്തേതുമായ ത്രോയില് 87.73ഉം മീറ്റര് ദൂരവും താരത്തിന് കണ്ടെത്താനായി. 90 മീറ്റര് കണ്ടെത്താന് കഴിയാതിരുന്നത് മാത്രമാണ് നീരജിന് നിരാശയായത്. ഇന്ത്യയുടെ കിഷോര് ജെന 84.77 മീറ്ററും ഡി പി മനു 84.14 മീറ്ററും എറിഞ്ഞത് അവരുടെ ഫൈനലിലെ മികച്ച ദൂരം കുറിച്ചു. കിഷോര് അഞ്ചാമതും മനു ആറാമതും ഫിനിഷ് ചെയ്തു.
Comments