തിരുവനന്തപുരം: തലസ്ഥാനത്ത് ബാലഗോകുലം സംഘടിപ്പിച്ച ശ്രീകൃഷ്ണ ജയന്തി ആഘോഷത്തിൽ സുരേഷ് ഗോപിയുടെ മകനും നടനുമായ ഗോകുൽ സുരേഷും. പാളയത്ത് മഹാശോഭായാത്രയിൽ നിലവിളക്ക് തെളിയിച്ച് ചടങ്ങിൽ ഗോകുൽ സജീവ പങ്കാളിയായി. കൂടാതെ കുട്ടികൾക്കൊപ്പം ശോഭയാത്രയിലും യുവതാരം പങ്കെടുത്തു. സംഗമ ഘോഷയാത്ര ഡോ. ബി ഗോവിന്ദൻ ഉദ്ഘാടനം ചെയ്തു. പ്രശസ്ത നർത്തകി ഗായത്രി സുബ്രഹ്മണ്യം പങ്കെടുത്തു.
അകലട്ടെ ലഹരി, ഉണരട്ടെ മൂല്യവും ബാല്യവും എന്നതായിരുന്നു ഇത്തവണത്തെ ജന്മാഷ്ടമി സന്ദേശം. ഉച്ചകഴിഞ്ഞപ്പോൾ തന്നെ തിരുവനന്തപുരം നഗരം അക്ഷരാർത്ഥത്തിൽ വൃന്ദാവനമായി മാറിയിരുന്നു. വിവിധ ബാലഗോകുലങ്ങളിൽ നിന്നെത്തിയ കുട്ടികൾ പത്തു കേന്ദ്രങ്ങളിൽ ഒത്തു കൂടി. ചെറു ശോഭായാത്രകൾ പാളയം ഗണപതി ക്ഷേത്രത്തിനുമുന്നിലാണ് സംഗമിച്ചത്. ഭക്തിയുടെയും വിശ്വാസത്തിന്ർറെയും സംഘടനാ ശക്തിയുടെയും നേർക്കാഴ്ചയായിരുന്നു ശ്രീകൃഷ്ണ ജയന്തി ശോഭായാത്ര.
സംഗമ ശോഭയാത്രയ്ക്ക് ബാലഗോകുലം സംസ്ഥാന പൊതുകാര്യദർശി കെ എൻ സജികുമാർ ശ്രീകൃഷ്ണജയന്തി സന്ദേശം നൽകി. കൃഷ്ണ സങ്കല്പത്തിന്റെയും ജീവിത ദർശനത്തിന്റെയും ധാർമ്മിക മൂല്യ ഭാവങ്ങളെ ആധുനിക ജീവിതത്തിൽ ആവിഷ്കരിക്കാനുള്ള സർഗ്ഗാത്മക ഇടപെടലാണ് ബാലഗോകുലം നടത്തുന്നതെന്ന് അദ്ദേഹം പറഞ്ഞു.
