ശമ്പളം വാങ്ങുന്നവർക്ക് വിരമിക്കൽ കാലത്തേക്കുള്ള സഹായമെന്ന നിലയിലാണ് എംപ്ലോയീസ് പ്രൊവിഡന്റ് ഫണ്ട് നിക്ഷേപിക്കുന്നത്. ജോലിയിൽ കയറിയത് മുതൽ വിരമിക്കുന്നത് വരെ ഇപിഎഫിലേക്ക് തൊഴിലാളിയും തൊഴിൽ ഉടമയും വിഹിതം അടയക്കുന്നതാണ് ഈ തുക. വിരമിക്കുന്നതിന് മുമ്പ് തന്നെ ഇപിഎഫിൽ നിന്നും പണം പിൻവലിക്കാൻ സാധിക്കും എന്ന ഗുണവും ഈ പദ്ധതിക്കുണ്ട്. പെട്ടെന്നുണ്ടാകുന്ന സാമ്പത്തിക ആവശ്യങ്ങൾക്ക് ഇത് ഗുണകരമാണ്.
വിവിധ ആവശ്യങ്ങൾക്ക് ഇപിഎഫിൽ നിന്നും പണം പിൻവലിക്കാനാകും. എന്നാൽ വിരമിക്കൽ കാലത്ത് മാത്രമാണ് മുഴുവൻ തുക പിൻവലിക്കാൻ സാധിക്കുകയുള്ളു എന്നതാണ് വാസ്തവം. വീടിന്റെ അറ്റകുറ്റപ്പണി, ഭവന വായ്പ തിരിച്ചടവ്, കല്യാണം എന്നീ ആവശ്യങ്ങൾക്ക് പണം പിൻവലിക്കാൻ സാധിക്കും. വിവിധ ആവശ്യങ്ങൾക്ക് എങ്ങനെ പണം പിൻവലിക്കാം എന്ന് നോക്കാം..
വിവാഹ ആവശ്യങ്ങൾക്ക്
സ്വന്തം വിവാഹത്തിനോ മക്കളുടെയോ സഹോദരങ്ങളുടെയോ വിവാഹത്തിനോ ഇപിഎഫ് പിൻവലിക്കാൻ സാധിക്കും. 50 ശതമാനം വരെ അഡ്വാൻസ് ആണ് ഈ സമയത്ത് ലഭിക്കുക. തൊഴിലാളികളുടെ വിഹിതവും പലിശയും അടങ്ങുന്ന തുകയുടെ 50 ശതമാനമാണ് പിൻവലിക്കാനാകുക. വിവാഹ ആവശ്യത്തിനായി മൂന്ന് തവണ തുക പിൻവലിക്കാനാകും. എന്നാൽ അംഗത്വമെടുത്ത് ഏഴ് വർഷം പൂർത്തിയായതിന് ശേഷം മാത്രമേ പിൻവലിക്കാനാകൂ.
ഭവന വായ്പ റീപെയ്മെന്റ്
ഭവന വായപയുടെ തിരിച്ചടവിന് ഇപിഎഫിൽ നിന്നും വലിയ തുക പിൻവലിക്കാൻ സാധിക്കും. ഭവന വായ്പ ബാധ്യത തീർക്കുന്നതിനായി 90 ശതമാനം വരെ തുക പിൻവലിക്കാൻ സാധിക്കും. നിലവിലുള്ള തൊഴിലുടമയ്ക്ക് കീഴിൽ മൂന്ന് വർഷം പൂർത്തിയാക്കിയവർക്ക് മാത്രമാകും ഇത് സാദ്ധ്യമാകുക.
ആരോഗ്യ ചെലവുകൾക്ക്
വരിക്കാരനോ കുടുംബാംഗങ്ങൾക്കോ ഉണ്ടാകുന്ന ആരോഗ്യ പ്രശ്നങ്ങൾക്ക് ചികിത്സയ്ക്കായും തുക പിൻവലിക്കാനാകും. ഭാര്യ, മക്കൾ, രക്ഷിതാക്കൾ എന്നിവരുടെ ആരോഗ്യ ചെലവുകൾക്കാണ് പണം പിൻവലിക്കാനാകുക. ജീവനക്കാരന്റെ വിഹിതവും പലിശയും ചേർന്ന തുകയോ അല്ലെങ്കിൽ ആറ് മാസത്തെ ക്ഷാമബത്തയും ശമ്പളവും ചേർന്ന തുകയോ അനുവദിക്കും.
മുഴുവൻ തുകയും പിൻവലിക്കാനാകും
ജോലി നഷ്ടമാകുന്ന സാഹചര്യത്തിൽ അക്കൗണ്ടിലുള്ള മുഴുവൻ തുകയും പിൻവലിക്കാനാകും. ആദ്യ ഘട്ടത്തിൽ 75 ശതമാനവും രണ്ടാം ഘട്ടത്തിൽ 25 ശതമാനവും പിൻവലിക്കാൻ സാധിക്കും.
Comments