ആലപ്പുഴ: കായംകുളം കെഎസ്ആർടിസി സ്റ്റാൻഡിലെ കാന്റീൻ അടച്ചുപൂട്ടാൻ നോട്ടീസ്. കാന്റീൻ ശുചിത്വം പാലിക്കുന്നില്ലെന്ന് കണ്ടെത്തിയതോടെ നഗരസഭ ആരോഗ്യ വിഭാഗമാണ് നോട്ടീസ് നൽകിയത്. കാന്റീനിനെതിരെ നിരന്തരമായ പരാതികൾ വന്നതിന്റെ അടിസ്ഥാനത്തിൽ ആരോഗ്യ വിഭാഗം നടത്തിയ പരിശോധനയിലാണ് ശുചിത്വമില്ലായ്മ ശ്രദ്ധയിൽപ്പെട്ടത്. ഭക്ഷണ മാലിന്യങ്ങൾ അടക്കം സംസ്കരിക്കാതെ സൂക്ഷിക്കുന്നതായി പരിശോധനയിൽ കണ്ടെത്തി.
പ്ലാസ്റ്റിക് കവറുകളിലും മറ്റുമായി സൂക്ഷിച്ചിരുന്ന ഭക്ഷണാവശിഷ്ടങ്ങളിൽ നിന്ന് ദുർഗന്ധം വമിക്കുന്നുണ്ടായിരുന്നു. ഇത് സംബന്ധിച്ച് ലഭിച്ച പരാതികളെ തുടർന്ന് പല തവണ മാലിന്യം സംസ്കരിക്കണമെന്ന് കാണിച്ച് കാന്റീൻ നടത്തിപ്പുകാർക്ക്, നഗരസഭ രേഖാമൂലം അറിയിപ്പു നൽകിയിരുന്നു. എന്നാൽ ഈ നിർദ്ദേശം പാലിക്കാൻ കാന്റീൻ നടത്തിപ്പുകാർ തയ്യാറായിരുന്നില്ലെന്നും ആരോഗ്യ വിഭാഗം ജീവനക്കാർ പറയുന്നു.
നഗരസഭാ സെക്രട്ടറിക്ക് ഫോണിൽ ലഭിച്ച പരാതിയുടെ അടിസ്ഥാനത്തിലായിരുന്നു പരിശോധന നടത്തിയത്. തുടർന്ന് വൃത്തിഹീനമായ സാഹചര്യത്തിൽ സ്ഥാപനം പ്രവർത്തിപ്പിക്കാൻ കഴിയില്ലെന്നും അടച്ചിടണമെന്നും ജൂനിയർ ഹെൽത്ത് ഇൻസ്പെക്ടർ നോട്ടീസ് നൽകി. മാലിന്യ സംസ്കരണ സംവിധാനം ഏർപ്പെടുത്തിയ ശേഷം ഇനി പ്രവർത്തിച്ചാൽ മതിയെന്നും ജൂനിയർ ഹെൽത്ത് ഇൻസ്പെക്ടർ വ്യക്തമാക്കി. ജൂനിയർ ഹെൽത്ത് ഇൻസ്പെക്ടർ സീനമോളുടെ നേതൃത്വത്തിലുള്ള സംഘമാണ് ക്യാന്റീനിൽ പരിശോധന നടത്തി നടപടിയെടുത്തത്.
