പ്രമുഖ കംപ്യൂട്ടർ നിർമ്മാണ കമ്പനിയായ എച്ച്പി ഗൂഗിളുമായി കൈകോർക്കുന്നു. ഇരു കമ്പനികളും സംയുക്തമായി ഇന്ത്യയിൽ ഒക്ടോബർ രണ്ട് മുതൽ ക്രേംബുക്ക് നിർമ്മിക്കുമെന്ന് എച്ച്പി വ്യക്തമാക്കി. ചെന്നൈ ആസ്ഥാനമായുള്ള ഫ്ളക്സ് ഫെസിലിറ്റിയിലാകും ക്രോംബുക്കുകൾ നിർമ്മിക്കുക. 2020 ഓഗസ്റ്റ് മുതൽ എച്ച്പി ലാപ്ടോപ്പുകളുടെയും ഡെസ്ക്ടോപ്പുകളുടെയും ശ്രേണി നിർമ്മിക്കുന്നത് ഇവിടെയാണ്.
ഇന്ത്യൻ വിദ്യാർത്ഥികൾക്ക് ആശ്വാസമേകാൻ ഇന്ത്യയിൽ നിർമ്മിക്കുന്ന ക്രോംബുക്കുകൾക്ക് കഴിയും. രാജ്യത്ത് നിർമ്മാണ പ്രവർത്തനങ്ങൾ വിപുലീകരിക്കാനാണ് തങ്ങളുടെ പദ്ധതിയെന്ന് എച്ച്പി ഇന്ത്യ സിനീയർ ഡയറക്ടർ വിക്രം ബേദി പറഞ്ഞു. ഇന്ത്യയുടെ ആത്മനിർഭർ ഭാരതിനെ പിന്തുണയ്ക്കുകയാണ് കമ്പനിയുടെ ലക്ഷ്യമെന്നും അദ്ദേഹം അറിയിച്ചു. ക്രോംബുക്കിന്റെ ആഭ്യന്തര നിർമ്മാണം ഇന്ത്യയിലെ വിദ്യഭ്യാസ മേഖലയിലെ ഡിജിറ്റൽ പരിവർത്തനത്തെ പിന്തുണയ്ക്കുന്നതിനുള്ള സുപ്രധാന ചുവടുവെപ്പാണെന്ന് ഗൂഗിളിന്റെ സൗത്ത് ഏഷ്യൻ എജ്യുക്കേഷൻ ഡിപ്പാർട്ട്മെന്റ് മേധാവി ബാനി ധവാൻ പറഞ്ഞു.
സ്കൂളുകൾ, വിദ്യാഭ്യാസ സ്ഥാപനങ്ങൾ എന്നിവിടങ്ങളിൽ താങ്ങാനാവുന്ന തരത്തിലാകും എച്ച്പി ക്രോം ബുക്ക് പുറത്തിറക്കുക. സുരക്ഷിതവും ഉയർന്ന നിലവാരമുള്ളതുമായ ഉപകരണങ്ങൾ നൽകി രാജ്യത്തെ ഡിജിറ്റൽ വിദ്യാഭ്യാസ ആവാസ്ഥ വ്യവസ്ഥയെ പിന്തുണയ്ക്കുകയാണ് ലക്ഷ്യമെന്ന് കമ്പനി പ്രസ്താവയിൽ വ്യക്തമാക്കി. എച്ച്പിയുടെ ഇന്ത്യയിലെ വിൽപന വർദ്ധനയ്ക്കും ഇത് കാരണമാകും. 2020 മുതലാണ് എച്ച്പി ഇന്ത്യയിൽ നിർമ്മാണം ആരംഭിച്ചത്. 2021 ഡിസംബർ മുതൽ, HP EliteBooks, HP ProBooks, HP G8 സീരീസ് നോട്ട്ബുക്കുകൾ എന്നിവയുൾപ്പെടെ നിരവധി ലാപ്ടോപ്പുകൾ ഇന്ത്യയിൽ നിർമ്മിക്കുന്നു. ലിനക്സ് അധിഷ്ഠിത ക്രോം ഓപ്പറേറ്റിങ് സിസ്റ്റത്തിൽ പ്രവർത്തിക്കുന്ന ലാപ്ടോപാണ് ക്രോം ബുക്ക്.