മോഹൻലാലിനെ നായകനാക്കി പൃഥ്വിരാജിന്റെ സംവിധാനത്തിൽ ഒരുങ്ങിയ മലയാളത്തിലെ ഏറ്റവും വലിയ ഹിറ്റാണ് ലൂസിഫർ. സ്റ്റീഫൻ നെടുമ്പള്ളി എന്ന പൊതുപ്രവർത്തകാനായി മാസ് ഡയലോഗുകളിലൂടെ മോഹൻലാൽ ആരാധകരെ ആവേശം കൊള്ളിച്ചത് കുറച്ചൊന്നുമായിരുന്നില്ല. എന്നാൽ ആരാധകരെ അതിനെക്കാൾ ആവേശംകൊള്ളിച്ചത് ചിത്രത്തിന്റെ ക്ലൈമാക്‌സ് ആയിരുന്നു. ചിത്രത്തിന് ഒരു രണ്ടാം ഭാഗം കൂടി ഉണ്ടെന്ന് ആദ്യ പതിപ്പിൽ തന്നെ അണിയറ പ്രവർത്തകർ അറിയിക്കുകയായിരുന്നു ക്ലൈമാക്‌സിലൂടെ.
ഇപ്പോഴിതാ ചിത്രത്തിന്റെ രണ്ടാം ഭാഗമായ എംപുരാന്റെ ലോഞ്ച് വീഡിയോ അണിയറ പ്രവർത്തകർ പങ്കുവെച്ചിരിക്കുകയാണ്. ആദ്യ ഭാഗത്തിലുടനീളം ചർച്ച ചെയ്യപ്പെട്ട കാര്യമായിരുന്നു ‘സ്റ്റീഫൻ നെടുമ്പള്ളി കഴിഞ്ഞ 26 വർഷം എവിടെയായിരുന്നെന്നത്’. ആ ഫ്‌ളാഷ് ബാക്കിന് ഉജ്ജ്വമായ തുടക്കമാണ് ഇപ്പോൾ പുറത്ത് വന്നിരിക്കുന്ന വീഡിയോ. ലൂസിഫറിലെ പ്രധാന രംഗങ്ങൾ കോർത്തിണക്കിയാണ് ടീസർ ഒരുക്കിയിരിക്കുന്നത്. ഒപ്പം ടീസറിന്റെ അവസനം ‘അവൻ തിരിച്ച് വരുന്നു’ എന്ന ഗോവർദ്ധന്റെ ഡയലോഗ് കൂടി ആകുമ്പോൾ ആരാധകരുടെ ആവേശത്തിന് ഒന്നുകൂടി ആക്കം കൂട്ടുകയാണ്.
ലോഞ്ച് വീഡിയോയ്‌ക്കൊപ്പം ചിത്രത്തിന്റെ മറ്റൊരു പ്രഖ്യാപനവും നടന്നിരിക്കുകയാണ്. എംപുരാന്റെ നിർമ്മാണത്തിൽ ആശീർവാദ് സിനിമാസിനൊപ്പം തമിഴിലെ പ്രശസ്ത നിർമ്മാണ കമ്പിനിയായ ലൈക പ്രൊഡക്ഷൻസും ചേരുകയാണെന്ന്. ആദ്യമായാണ് ലൈക പ്രൊഡക്ഷൻസ് മലയാളത്തിൽ എത്തുന്നത്. ഒക്ടോബർ അഞ്ചിന് സിനിമയുടെ ചിത്രീകരണം ആരംഭിക്കും. ഉത്തരേന്ത്യയും തമിഴ്‌നാടും വിദേശരാജ്യങ്ങളുമാകും സിനിമയുടെ പ്രധാന ലൊക്കേഷനുകൾ. കേരളത്തിൽ ചിത്രീകരണമുണ്ടാകുമോ എന്ന് വ്യക്തമല്ല. മുരളി ഗോപിതന്നെയാണ് കഥയും തിരക്കഥയും ഒരുക്കിയിരിക്കുന്നത്.
