വാഷിംഗ്ടണ്: ഭരണഘടനാ ശില്പി ബി.ആര് അംബേദ്കറിന്റെ ഏറ്റവും വലിയ പ്രതിമകളിലൊന്ന് അമേരിക്കയിലെ മേരിലാന്ഡില് ഒക്ടോബര് 14ന് അനാച്ഛാദനം ചെയ്യും. സ്റ്റാച്യൂ ഓഫ് ഇക്വാളിറ്റി (സമത്വത്തിന്റെ പ്രതിമ) എന്ന് പേരിട്ടിരിക്കുന്ന അംബേദ്കര് പ്രതിമയുടെ ഉയരം 19 അടിയാണ്. അംബേദ്കറിനായി സ്ഥാപിച്ച ഇന്ത്യക്ക് പുറത്തുള്ള ഏറ്റവും വലിയ പ്രതിമയാണിത്.
വാഷിംഗ്ടണില് നിന്ന് ഏകദേശം 35 കിലോമീറ്റര് മാറി തെക്ക് മേരിലാന്ഡിലെ അക്കോക്കീക്ക് നഗരത്തില് 13 ഏക്കര് സ്ഥലത്താണ് പ്രതിമ നിര്മ്മിച്ചിരിക്കുന്നത്. അംബേദ്കര് ഇന്റര്നാഷണല് സെന്ററിന്റെ (എഐസി) ഭാഗമായാണ് പ്രതിമ സ്ഥാപിച്ചിരിക്കുന്നത്. ഗുജറാത്തില് സ്ഥാപിച്ച സ്റ്റാച്യൂ ഓഫ് യൂണിറ്റി എന്നറിയപ്പെടുന്ന സര്ദാര് വല്ലഭഭായ് പട്ടേലിന്റെ പ്രതിമ നിര്മ്മിച്ച ശില്പി രാം സുതാറാണ് സ്റ്റാച്യൂ ഓഫ് ഇക്വാളിറ്റിയും നിര്മ്മിച്ചിരിക്കുന്നത്.
1891 ഏപ്രില് 14-ന് ജനിച്ച ഭീം റാവു അംബേദ്കര് അദ്ദേഹത്തിന്റെ അനുയായികള്ക്കിടയില് ബാബാസാഹേബ് എന്നായിരുന്നു അറിയപ്പെട്ടിരുന്നത്. ഇന്ത്യയുടെ ഭരണഘടന തയ്യാറാക്കുന്നതില് നിര്ണായ പങ്കുവഹിച്ച ഡ്രാഫ്റ്റിംഗ് കമ്മിറ്റിയുടെ ചെയര്മാനായിരുന്ന അദ്ദേഹം. അങ്ങനെയാണ് ഇന്ത്യന് ഭരണഘടനയുടെ ശില്പിയെന്ന് അംബേദ്കര് അറിയപ്പെടാനാരംഭിച്ചത്.