ആർട്ടിഫിഷ്യൽ ഇന്റലിജൻസ് സാങ്കേതിക വിദ്യകൾക്ക് വേണ്ടി മൈക്രോസോഫ്റ്റ് രൂപകൽപ്പന ചെയ്ത ആദ്യ ചിപ്പ് അടുത്തമാസം പുറത്തിറങ്ങും. ഇഗ്നൈറ്റ് എന്ന് പേരിട്ടിരിക്കുന്ന കമ്പനിയുടെ വാർഷിക ഡെവലപ്പർ കോൺഫറൻസിൽ ചിപ്പ് അവതരിപ്പിക്കും. എൻവിഡിയ നിർമ്മിക്കുന്ന ചിപ്പുകളെ അമിതമായി ആശ്രയിക്കുന്നത് അവസാനിപ്പിക്കുക എന്നത് ലക്ഷ്യം വെച്ചാണ് നീക്കം.
എഐ സാങ്കേതിക വിദ്യകളുടെ പെട്ടെന്നുള്ള വികാസം എഐയുടെ ചിപ്പുകളുടെ ക്ഷാമത്തിലേക്ക് നയിച്ചിട്ടുണ്ട്. നിലവിൽ മെച്ചപ്പെട്ട എഐ ചിപ്പുകൾ നിർമ്മിക്കുന്ന ഏക കമ്പനി എൻവിഡിയ ആണെന്നതും പ്രതിസന്ധിക്ക് കാരണമായി. ഒട്ടുമിക്ക വൻകിട കമ്പനികളും എഐ ചിപ്പുകൾക്ക് വേണ്ടി ആശ്രയിക്കുന്നത് എൻവിഡിയയെയാണ്. ഇത് കൂടുതൽ പ്രതിസന്ധിയിലേക്ക് നയിക്കുകയായിരുന്നു.
എൻവിഡിയുടെ ഗ്രാഫിക് പ്രോസസിംഗ് യൂണിറ്റിന് സമാനമായ ചിപ്പാണ് മൈക്രോസോഫ്റ്റ് അവതരിപ്പിക്കുന്നത്. ഡാറ്റാ സെന്ററുകളിലെ സെർവറുകൾക്ക് വേണ്ടിയാണ് നിർമ്മാണം. മൈക്രോസോഫ്റ്റിന്റെ ഡാറ്റാ സെന്ററുകളിൽ ഉപയോഗിക്കുന്നത് എൻവിഡിയയുടെ ചിപ്പുകളാണ്. ഓപ്പൺ എഐ ഉൾപ്പെടെയുള്ള എഐ സ്ഥാപനങ്ങൾ ആശ്രയിക്കുന്നതും വിവിധ എഐ പ്രൊഡക്ടിവിറ്റി ആപ്പുകൾ പ്രവർത്തിക്കുന്നതും ഇവയുടെ സഹായത്തോടെയാണ്.