കോട്ടയം: ചികിത്സ കഴിഞ്ഞ് തിരിച്ചു വീട്ടിലേക്ക് മടങ്ങി വരുന്നതിനിടെ കാർ ടെലിഫോൺ പോസ്റ്റിലിടിച്ച് വീട്ടമ്മയ്ക്ക് ദാരുണാന്ത്യം. കട്ടപ്പന സ്വദേശി അമ്മിണി മാത്യു ആണ് മരിച്ചത്. ഇന്ന് പുലർച്ച 4:30-ഓടെ കാഞ്ഞിരപ്പിള്ളിയിലെ സിവിൽ സ്റ്റേഷനു മുന്നിൽ വച്ചായിരുന്നു അപകടം.
കോട്ടയത്തെ ഒരു ആശുപത്രിയിൽ നിന്നും ചികിത്സ കഴിഞ്ഞ് കട്ടപ്പന ഭാഗത്തേക്ക് തിരിച്ച് പോകുമ്പോഴാണ് ടെലിഫോൺ പോസ്റ്റിലിടിച്ച് അപകടം സംഭവിച്ചത്. അമ്മിണിയുടെ മകൻ ജേക്കപ്പായിരുന്നു വാഹനം ഓടിച്ചത്. ഇവരെ കൂടാതെ അമ്മണിയുടെ മകൾ ബ്ലസിയും വാഹനത്തിലുണ്ടായിരുന്നു. അപകടത്തിൽ ഗുരുതര പരിക്കേറ്റ് ഇവർ ചികിത്സയിലാണ്. വാഹനം ഓടിച്ചയാൾ ഉറങ്ങി പോയതാണ് അപകടത്തിന് കാരണമെന്നാണ് പോലീസിന്റെ പ്രാഥമിക നിഗമനം. വാഹനം പോസ്റ്റിലിടിച്ചതിനെ തുടർന്ന് ഗുരുതര പരിക്കേറ്റ അമ്മിണിയെ ഉടൻ തന്നെ തൊട്ടടുത്തുള്ള സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
