എറണാകുളം: സിനിമാ വ്യവസായത്തെ നശിപ്പിക്കരുതെന്ന് ഹൈക്കോടതി നിർദ്ദേശം. പ്രൊഡ്യൂസേഴ്സ് അസോസിയേഷൻ ഇത്രയും കാലം എന്ത് ചെയ്തെന്നും കോടതി ഇടപ്പെട്ടപ്പോൾ മാത്രമാണ് അസോസിയേഷൻ രംഗത്ത് വന്നതെന്നും ഹൈക്കോടതി വിമർശിച്ചു. റിലീസ് ദിനത്തിൽ തിയേറ്റർ കേന്ദ്രീകരിച്ചുള്ള നെഗറ്റീവ് റിവ്യൂ നിയന്ത്രിക്കണമെന്ന ഹർജി പരിഗണിയ്ക്കവെയാണ് ഹൈക്കോടതി ഇക്കാര്യം വ്യക്തമാക്കിയത്.
റിലീസ് ചെയ്ത് ഏഴ് ദിവസം വരെ റിവ്യൂ പാടില്ലെന്ന് ഒരു ഉത്തരവും ഇറക്കിയിട്ടില്ലെന്നും
റിവ്യൂവിനെതിരെ പ്രത്യേക പ്രോട്ടോകോളില്ലെന്നും ഹൈക്കോടതി വ്യക്തമാക്കി. ആരോമലിന്റെ ആദ്യ പ്രണയം എന്ന സിനിമയുടെ സംവിധായകൻ മുബീൻ നൗഫൽ നൽകിയ ഹർജിയാണ് കോടതി പരിഗണിച്ചത്.
സിനിമ കാണുക പോലും ചെയ്യാതെ സാമൂഹ്യമാദ്ധ്യമങ്ങളിലൂടെ നെഗറ്റീവ് റിവ്യൂകൾ പ്രചരിപ്പിക്കുന്നത് നിയന്ത്രിക്കണമെന്ന് ആവശ്യപ്പെട്ടാണ് മുബീൻ നൗഫൽ ഹൈക്കാടതിയിൽ ഹർജി നൽകിയത്. വിഷയത്തിൽ ഹൈക്കോടതി കേന്ദ്ര, സംസ്ഥാന സർക്കാരുകളുടെ വിശദീകരണം തേടിയിരുന്നു.
