പൂക്കളിൽ നിന്നും ഹൃദയാഘാതം വരെ ഉണ്ടാകാൻ സാദ്ധ്യതയെന്ന് വിദഗ്ധർ. ഫോക്‌സ്‌ഗ്ലോവ് എന്ന ചെടിയുടെ ജന്മദേശമാണ് യൂറോപ്പും ഏഷ്യയും. എന്നാൽ ഇന്ന് ലോകമെമ്പാടുമുള്ള പൂന്തോട്ടങ്ങളിൽ ഈ ചെടിയുണ്ട്. ശാസ്ത്രീയമായി ഡിജിറ്റലിസ് എന്ന് അറിയപ്പെടുന്ന ഫോക്‌സ്‌ഗ്ലോവിൽ മനോഹരമായ പൂക്കളാണുള്ളത്. പിങ്ക്, വെള്ള എന്നിങ്ങനെ പല നിറങ്ങളിൽ ഈ പൂക്കൾ കാണപ്പെടുന്നു. ഉയരത്തിൽ വളരുന്നു എന്നതിനാൽ തന്നെ പൂന്തോട്ടങ്ങളുടെ ഭംഗി വർദ്ധിപ്പിക്കാൻ ഇവയ്‌ക്ക് കഴിയുന്നു. എന്നാൽ സൗന്ദര്യത്തിന് പുറമെ ഇവയ്‌ക്ക് മറ്റ് ചില കാര്യങ്ങൾ കൂടിയുണ്ടെന്ന പഠനമാണ് പുറത്ത് വന്നിരിക്കുന്നത്.
ഹൃദയത്തിൽ ശക്തമായ സ്വാധീനം ചെലുത്താൻ സഹായിക്കുന്ന കാർഡിയാക് ഗ്ലൈക്കോസൈഡ് ഡിഗോക്‌സിൻ എന്നിങ്ങനെയുള്ള സംയുക്തങ്ങൾ ഇതിൽ അടങ്ങിയിട്ടുണ്ട്.ഒരു വ്യക്തിക്ക് ഹൃദയാഘാതം വരെ ഉണ്ടാക്കാനുള്ള സാധ്യത ഏറെയാണ്. ഹൃദയ പേശികളിലെ പ്രവർത്തനത്തിനെ പ്രതികൂലമായി ബാധിക്കാൻ ഈ ചെടികളുമായുള്ള സമ്പർക്കം ഇടയാക്കും. രക്തസഞ്ചാരത്തെ പ്രതികൂലമായി ബാധിക്കുകയും ഇത് ഹൃദയമിടിപ്പ് വർദ്ധിക്കുന്നതിനും കാരണമാകുന്നു.
ഹൃദയത്തിന്റെ സ്വാഭാവിക പ്രവർത്തത്തിൽ ഉണ്ടാകുന്ന താളപ്പിഴവ് പെട്ടെന്നുള്ള ഹൃദയസ്തംഭനത്തിലേക്കും മരണത്തിനും വരെ കാരണമായേക്കാം. എന്നാൽ ഇവയിൽ അടങ്ങിയിരിക്കുന്ന ഡിഗോക്‌സിൻ ഹൃദ്രോഗ മരുന്നിനും പേര് കേട്ടവയാണ്. മറ്റ് മരുന്നുകൾ പരാജയപ്പെടുമ്പോൾ ഹൃദയസ്തംഭനം തടയുന്നതിന് ഡോക്ടർമാർ ഡിഗോക്‌സിൻ നിർദ്ദേശിക്കാറുണ്ട്. എന്നാൽ ആരെങ്കിലും ചെടിയുടെ ഭാഗം അബദ്ധവശാൽ കഴിക്കുകയാണ് എങ്കിൽ വിദഗ്ധ ചികിത്സയ്‌ക്കായി ആശുപത്രിയിൽ എത്തണമെന്നും പഠനത്തിൽ പറയുന്നു.
