ആപ്പിൾ ഉപകരണങ്ങളിൽ സുരക്ഷാ വീഴ്ച കണ്ടെത്തിയതിനെ തുടർന്ന് മുന്നറിയിപ്പുമായി ഇന്ത്യൻ കമ്പ്യൂട്ടർ എമർജൻസി റെസ്പോൺസ് ടീം. ഒക്ടോബർ 14-ന് പുറത്തിറക്കിയ റിപ്പോർട്ടിലാണ് ആപ്പിൾ ഐഒഎസിന്റെയും ഐപാഡ് ഒഎസിന്റെയും സുരക്ഷയുമായി ബന്ധപ്പെട്ട പ്രശ്നങ്ങൾ ചൂണ്ടിക്കാട്ടി മുന്നറിയിപ്പ് നൽകിയിരിക്കുന്നത്. ഐടി മന്ത്രാലയത്തിന് കീഴിലായി രാജ്യത്തെ സൈബർ സുരക്ഷയുമായി ബന്ധപ്പെട്ട് പ്രവർത്തിക്കുന്ന ഏജൻസിയാണ് കമ്പ്യൂട്ടർ എമർജൻസി റെസ്പോൺസ് ടീം.
ഐഒഎസിലും ഐപാഡ് ഒഎസിലുമുള്ള സുരക്ഷാ വീഴ്ചയിലൂടെ പുറത്തു നിന്നും ഒരാൾക്ക് ദുരുപയോഗം ചെയ്യാൻ സാധിക്കുമെന്നും ഇതിലൂടെ ഉപകരണത്തിന്റെ നിയന്ത്രണം കൈക്കലാക്കാൻ സാധിക്കുമെന്നും പറയുന്നു. 16.7.1 വേർഷന് മുമ്പുള്ള ഐഒഎസിനും ഐപാഡ് ഒഎസിലുമാണ് പ്രശ്നം കണ്ടെത്തിയിരിക്കുന്നത്. ഐഫോൺ 8, ഐപാഡ് പ്രോ, മൂന്നാം തലമുറ ഐപാഡ് എയർ, അഞ്ചാം തലമുറ ഐപാഡ് എന്നിവയിലെല്ലാം ഈ ഒഎസ് വേർഷനാണ് ഉപയോഗിച്ചിരിക്കുന്നത്.
ഇതിനുള്ള പരിഹാരമെന്ന നിലയിൽ സുരക്ഷാ അപ്ഡേറ്റുകൾ ആപ്പിൾ പുറത്തിറക്കിയിട്ടുണ്ട്. ആപ്പിൾ നൽകുന്ന സുരക്ഷാ അപ്ഡേറ്റുകൾ ഉടൻ തന്നെ അപ്ഡേറ്റ് ചെയ്യണമെന്ന് ഏജൻസി പുറത്തിറക്കിയ റിപ്പോർട്ടിൽ പറയുന്നു.
