ബെംഗളൂരു: കൊറോണറി ആർട്ടറി ബൈപാസ് ഗ്രാഫ്റ്റിംഗ് (സിഎബിജി) ശസ്ത്രക്രിയയ്ക്ക് വിധേയനായ കർണാടക മുൻ മുഖ്യമന്ത്രി ബസവരാജ് ബൊമ്മൈയുടെ ആരോഗ്യനിലയെപ്പറ്റി അന്വേഷിച്ച് പ്രധാനമന്ത്രി നരേന്ദ്രമോദി. ബെംഗളൂരുവിലെ സ്വകാര്യ ആശുപത്രിയിൽ ചികിത്സയിൽ കഴിയുകയാണ് അദ്ദേഹം. താൻ ഉടൻ സുഖം പ്രാപിച്ച് ജനങ്ങളെ സേവിക്കാൻ മടങ്ങിവരുമെന്നാണ് പ്രധാനമന്ത്രിയുടെ ഫോൺകോളിന് പിന്നാലെ ബസവരാജ് ബൊമ്മൈ പ്രതികരിച്ചിരിക്കുന്നത്.
പ്രധാനമന്ത്രി നരേന്ദ്രമോദി തന്നെ വിളിച്ച് ആരോഗ്യവിവരങ്ങൾ ചോദിച്ചറിഞ്ഞുവെന്ന് ബസവരാജ് ബൊമ്മൈ തന്നെയാണ് വെളിപ്പെടുത്തിയത്. ‘ശുഭ അഷ്ടമി ദിനം, ഇത് എന്റെ ഏറ്റവും ഭാഗ്യ ദിനമാണ്. ആശുപത്രിയിൽ വിശ്രമിക്കുമ്പോൾ എന്റെ ആരോഗ്യത്തെക്കുറിച്ച് അന്വേഷിക്കാൻ എന്നെ വിളിച്ചതിന് പ്രിയപ്പെട്ട പ്രധാനമന്ത്രി നരേന്ദ്രമോദിക്ക് എന്റെ ഹൃദയം നിറഞ്ഞ നന്ദി. നിങ്ങളുടെ ഉത്കണ്ഠയും ആഗ്രഹവും എന്റെ ആത്മവിശ്വാസം വർദ്ധിപ്പിച്ചു. ഞാൻ ഉടൻ സുഖം പ്രാപിക്കും. ജനങ്ങളെ സേവിക്കാൻ മടങ്ങിവരും’ എന്ന്
ബൊമ്മൈ എക്സിൽ കുറിച്ചു.
63 കാരനായ ബസവരാജ് ബൊമ്മൈ ആരോഗ്യം വീണ്ടെടുത്ത് വരികയാണ്. ഏതാനും ആഴ്ചകൾക്കുള്ളിൽ അദ്ദേഹം പൂർണ്ണമായ ആരോഗ്യവും ഉന്മേഷവും വീണ്ടെടുക്കുമെന്ന് പ്രതീക്ഷിക്കുന്നതായി ബൊമ്മൈയെ ചികിത്സിക്കുന്ന ഡോക്ടർമാരും പറഞ്ഞു.