ദിസ്പൂർ: കുറ്റകൃത്യങ്ങളിൽ ഇസ്ലാം മതവിശ്വാസികൾ ഒന്നാം സ്ഥാനത്താണെന്ന് എഐയുഡിഎഫ് അദ്ധ്യക്ഷൻ ബദറുദ്ദീൻ അജ്മൽ. ഇതിനൊരു മാറ്റം വരാൻ ആൺകുട്ടികളും പെൺകുട്ടികളും വിദ്യാഭ്യാസം നേടണമെന്നും ഓൾ ഇന്ത്യ യുണൈറ്റഡ് ഡെമോക്രാറ്റിക് ഫ്രണ്ട് അദ്ധ്യക്ഷൻ പറഞ്ഞു. അസമിലെ ഗോൾപാറ ജില്ലയിലെ ഡോൽഗുമ അഞ്ചാലിക് കോളേജിൽ നടന്ന പരിപാടിയിൽ പ്രസംഗിക്കവെയാണ് അദ്ദേഹത്തിന്റെ പരാമർശം.
കുറ്റകൃത്യങ്ങളിൽ മുസ്ലീങ്ങളാണ് ഒന്നാം സ്ഥാനത്ത്. മോഷണം, കവർച്ച, ബലാത്സംഗം, പിടിച്ചുപറി തുടങ്ങി എല്ലാ കുറ്റകൃത്യങ്ങളിലും ഒന്നാം സ്ഥാനത്താണ്. ജയിലിൽ പോകുന്നതിലും ഒന്നാമതാണ്. നമ്മുടെ ആൺകുട്ടികൾക്കും പെൺകുട്ടികൾക്കും സ്കൂളിൽ പോകാൻ സമയമില്ല, പക്ഷേ ചൂതാട്ടത്തിനും മറ്റുള്ളവരെ പറ്റിക്കാനും അവർക്ക് മതിയായ സമയമുണ്ട്. തെറ്റായ കാര്യങ്ങളിൽ ആരൊക്കെയാണ് ഉൾപ്പെട്ടിരിക്കുന്നതെന്ന് നിങ്ങൾ പരിശോധിച്ചുനോക്കണം. അത് മുസ്ലീങ്ങളാണ്. ഏറെ സങ്കടകരമാണിതെന്നും അജ്മൽ കുറ്റപ്പെടുത്തി.
ആളുകൾ ചന്ദ്രനിലേക്കും സൂര്യനിലേക്കും പോകുന്നു. എന്നാൽ എങ്ങനെ ജയിലിൽ പോകണം എന്നതിനെക്കുറിച്ച് പിഎച്ച്ഡി ചെയ്യുകയാണ് മുസ്ലീങ്ങൾ. ഒരു പോലീസ് സ്റ്റേഷനിൽ കയറി നോക്കൂ, ഭൂരിപക്ഷം ആളുകളും – അബ്ദുറഹ്മാൻ, അബ്ദുർ റഹീം, അബ്ദുൾ മജീദ്, ബദ്റുദ്ദീൻ, സിറാജുദ്ദീൻ, ഫക്രുദ്ദീൻ.. എന്നിങ്ങനെ പേരുള്ളവരാകും. തീർത്തും സങ്കടകരമായ കാര്യമാണിത്. നിങ്ങൾ എന്തിനാണ് പൊതുസ്ഥലങ്ങളിൽ കാണുന്ന സ്ത്രീകളെ മോശം കണ്ണിലൂടെ നോക്കുന്നത്? നിങ്ങളുടെ വീട്ടിൽ അമ്മയും സഹോദരിയും ഇല്ലേ? നമ്മുടെ ആൺകുട്ടികൾ കാരണം തെരുവിലൂടെ നടന്നുപോകുന്ന പെൺകുട്ടികൾ സുരക്ഷിതരല്ലാതെ മാറി. മുസ്ലീം സമുദായത്തിന്റെ വികസനത്തിന് ഒരേയൊരു മാർഗമേയുള്ളൂ. വിദ്യാഭ്യാസം മാത്രം. സ്വന്തമായി വിദ്യാഭ്യാസം നേടുന്നതിനൊപ്പം സമൂഹത്തിന് വിദ്യാഭ്യാസം നൽകാനും മുസ്ലീം ആൺകുട്ടികളും പെൺകുട്ടികളും തയ്യാറാകണമെന്ന് എഐയുഡിഎഫ് അദ്ധ്യക്ഷൻ അഭ്യർത്ഥിച്ചു.
