മോഹൻലാൽ ആദ്യമായി സംവിധാനം ചെയ്യുന്ന ചിത്രം ‘ബറോസ്’നായി കാത്തിരിക്കുകയാണ് ആരാധകർ. ചിത്രത്തിന്റെ ഓരോ അപ്ഡേഷനുകളും ആകാംക്ഷയോടെയാണ് ആരാധകർ ഏറ്റെടുക്കുന്നത്. വർഷങ്ങൾ നീണ്ട അഭിനയ പാഠങ്ങളുമായാണ് മോഹൻലാൽ ചിത്രം സംവിധാനം ചെയ്യുന്നത്. ഇന്നിതാ ചിത്രത്തിന്റെ പുതിയ അപ്ഡേറ്റ് പങ്കുവെച്ചിരിക്കുകയാണ് താരം.
ചിത്രത്തിന്റെ സുപ്രധാന അപ്ഡേറ്റ് നവംബർ നാലിന് വൈകിട്ട് അഞ്ച് മണിയ്ക്ക് എത്തും എന്നാണ് മോഹൻലാൽ അറിയിച്ചിരിക്കുന്നത്. സാമൂഹ്യമാദ്ധ്യമത്തിലൂടെയാണ് താരം ഇക്കാര്യം പങ്കുവെച്ചത്. പോർച്ചുഗീസ് പശ്ചാത്തലത്തിലുള്ള സിനിമയാണ് ബറോസ്. വാസ്കോഡഗാമയുടെ നിധി സൂക്ഷിപ്പുകാരനായ ഭൂതമായാണ് ബറോസിനെ ആവിഷ്കരിക്കുന്നത്. 400 വർഷത്തിനിപ്പുറം ഈ നിധി അതിന്റെ യഥാർത്ഥ അവകാശിക്ക് കൈമാറാൻ ശ്രമിക്കുന്നതാണ് ചിത്രത്തിന്റെ പ്രമേയം.
2021 മാർച്ച് 21-നായിരുന്നു ചിത്രത്തിന്റെ ഔദ്യോഗിക ലോഞ്ചിംഗ് നടന്നത്. ത്രിഡി സാങ്കേതിക വിദ്യയിൽ അതി നൂതനമായ ടെക്നോളജികൾ ഉപയോഗിച്ചാണ് ‘ബറോസ്’ ഒരുക്കുന്നത്. ഗ്രാവിറ്റി ഇല്യൂഷൻ എന്ന ടെക്നിക്കും ചിത്രത്തിൽ ഉപയോഗിക്കുന്നുണ്ട്. ആശിർവാദ് സിനിമാസാണ് ചിത്രം നിർമ്മിക്കുന്നത്. ഇന്ത്യയിലെ ആദ്യ ത്രീഡി ചിത്രമായ ‘മൈ ഡിയർ കുട്ടിച്ചാത്തൻ’ സംവിധാനം ചെയ്ത ജിജോയുടെ കഥയെ ആസ്പദമാക്കിയാണ് സിനിമയൊരുക്കുന്നതെന്ന് മോഹൻലാൽ നേരത്തെ വെളിപ്പെടുത്തിയിരുന്നു.