ശ്രീനഗർ : വർഷങ്ങൾക്ക് ശേഷം കശ്മീരിൽ കുങ്കുമപ്പൂവ് ഉത്പാദനത്തിൽ റെക്കോർഡ് വർദ്ധന . കൃത്യസമയത്ത് മഴയും അനുയോജ്യമായ താപനിലയും ഉൽപാദനം വളരെയധികം മുന്നോട്ട് കൊണ്ടുപോകാൻ സഹായിച്ചതായി കർഷകർ പറയുന്നു.തെക്കൻ കശ്മീരിലെ പാംപോറിലെ കുങ്കുമ വയലിൽ കുട്ടികളടക്കം കുങ്കുമ പൂക്കൾ പറിക്കാൻ എത്തിയിട്ടുണ്ട് . പാംപോർ വയലുകളിലെ കുങ്കുമപ്പൂവ് വിളവെടുക്കുന്നത് കാണാൻ ധാരാളം സഞ്ചാരികളും ഉണ്ടായിരുന്നു
ഈ വർഷം കുങ്കുമപ്പൂവിന്റെ ഉൽപ്പാദനം കുതിച്ചുയരുമെന്ന് ഉറപ്പായിരുന്നുവെന്നാണ് പ്രദേശവാസിയായ ജഹാംഗീർ പറഞ്ഞത് . ” പഴയ കാലത്തിന് സമാനമായി കുങ്കുമപ്പൂക്കൾ ശേഖരിക്കുന്നത് ഇതാദ്യമായാണ് .കഴിഞ്ഞ എട്ട് വർഷമായി കുങ്കുമപ്പൂക്കളുടെ വലിയ കുലകൾ പാടത്ത് കാണാനില്ലായിരുന്നു, എന്നാൽ ഈ വർഷം ഇരട്ടി വിളവാണ് “- ജഹാംഗീർ പറയുന്നു.
അധികാരികൾ നൽകിയ GI ടാഗ് കശ്മീരി കുങ്കുമപ്പൂ കർഷകർക്ക് നല്ല നിരക്ക് നൽകിയതായും അദ്ദേഹം പറഞ്ഞു . 2014 മുതൽ ഏറ്റവും മികച്ച കുങ്കുമപ്പൂവ് ഉൽപാദനമാണ് തങ്ങൾ പ്രതീക്ഷിക്കുന്നതെന്ന് കുങ്കുമം ഉൽപാദക അസോസിയേഷൻ പ്രസിഡന്റ് അബ്ദുൾ മജീദ് പറഞ്ഞു. സമയോചിതമായ മഴ വീണ്ടും കർഷകർക്ക് രക്ഷയായി, ഈ വർഷം നല്ല വിളവെടുപ്പ് പ്രതീക്ഷിക്കുന്നു,” അദ്ദേഹം പറഞ്ഞു.കൃത്യസമയത്ത് ലഭിച്ച മഴയാണ് ഈ നല്ല മാറ്റത്തിന് കാരണമെന്ന് കർഷകർ പറയുന്നു
കുങ്കുമപ്പൂവ് ഉൽപ്പാദനം വർധിപ്പിക്കാനും കുങ്കുമപ്പൂ കൃഷി വർദ്ധിപ്പിക്കാനും ലക്ഷ്യമിട്ട് 2010-ൽ കേന്ദ്ര സർക്കാർ 500 കോടി ബജറ്റിൽ “ദേശീയ കുങ്കുമം മിഷൻ” ആരംഭിച്ചിരുന്നു.