ഉപയോക്താക്കളുടെ സ്വകാര്യത കാത്തുസൂക്ഷിക്കാൻ പുതിയ ഫീച്ചറുമായി ഇൻസ്റ്റഗ്രാം. പോസ്റ്റുകളും വീഡിയോകളും ഇനി ആര് കാണണം ആര് കാണ്ടേണ്ട എന്നെല്ലാം അക്കൗണ്ട് ഉടമയക്ക് തീരുമാനിക്കാവുന്ന തരത്തിൽ പുതിയൊരു ഫീച്ചറാണ് ഇൻസ്റ്റഗ്രാമിലെത്തുന്നത്. അടുത്ത സുഹൃത്തുകൾക്ക് മാത്രം കാണാൻ സാധിക്കുന്ന വിധത്തിൽ അക്കൗണ്ട് ഉപയോഗിക്കാനാകും.
നിലവിൽ സ്റ്റോറികളും ക്യാപ്ഷനുകളും ഇടുന്നതിന് ഈ ഫീച്ചർ ലഭ്യമാണ്. ഇപ്പോഴിതാ പോസ്റ്റിനും റീൽസിനും കൂടി ഈ സംവിധാനം ഏർപ്പെടുത്തുകയാണ് ഇൻസ്റ്റഗ്രാം. ഉപയോക്താക്കളുടെ സ്വകാര്യതയ്ക്കാണ് പ്രധാന്യം നൽകുന്നതെന്ന് മെറ്റ തലവൻ മാർക്ക് സക്കർബർഗ് അറിയിച്ചു.
ഇൻസ്റ്റഗ്രാമിലൂടെ വരുമാനം ലക്ഷ്യമിടുന്നവർക്ക് ഭാവിയിൽ ഈ ഫീച്ചർ സഹായകമാകുമെന്നാണ് വിവരം. പുതിയ ഫീച്ചർ കൊണ്ടുവരുന്നതിനായി ആദ്യം ഇൻസ്റ്റഗ്രാം ഓപ്പൺ ചെയ്ത് പുതിയ പോസ്റ്റ് തിരഞ്ഞെടുക്കുക. തുടർന്ന് ഓഡിയൻസ് ഓപ്ഷനിൽ ടാപ്പ് ചെയ്യുക. അതിൽ നിന്നും ഓഡിയൻസ് ലിസ്റ്റിലുള്ള ‘ക്ലോസ് ഫ്രണ്ട്സി’നെ തിരഞ്ഞെടുക്കുക. അതിനുശേഷം പോസ്റ്റ് ഷെയർ ചെയ്യാം.
വാട്സ്ആപ്പിലേത് പോലെ റീഡ് റെസിപ്പിയൻസ് ഓഫാക്കുന്നതിനുള്ള പുതിയ ഫീച്ചർ ഇൻസ്റ്റ്രഗാമും നേരത്തെ പുറത്തിറക്കിയിരുന്നു. പ്രൈവസി ഫീച്ചറിലാണ് ഇതുള്ളത്. എന്നാൽ ഈ ഫീച്ചർ എന്ന് മുതലാണ് ഉപയോക്താക്കളിലേക്ക് എത്തുന്നത് സംബന്ധിച്ച് കൂടുതൽ വിവരങ്ങളൊന്നും പുറത്തുവന്നിട്ടില്ല. വൈകാതെ ഫേസ്ബുക്ക് മെസഞ്ചറിലും ഈ അപ്ഡേറ്റ് ലഭ്യമാകുമെന്നാണ് പ്രതീക്ഷിക്കുന്നത്.
