ബീജിംഗ്: ചൈന ഒരിക്കലും മറ്റൊരു രാജ്യത്തെ പ്രകോപിപ്പിക്കാനോ, അവരുടെ പക്കൽ നിന്ന് ഒരിഞ്ച് ഭൂമി പോലും സ്വന്തമാക്കാനോ ശ്രമിച്ചിട്ടില്ലെന്ന് ചൈനീസ് പ്രസിഡന്റ് ഷി ജിൻ പിംഗ്. ഏഷ്യാ-പസഫിക് സാമ്പത്തിക സഹകരണ ഉച്ചകോടിയുടെ ഭാഗമായി നടന്ന അത്താഴവിരുന്നിനിടെയാണ് ഷി ജിൻ പിംഗിന്റെ പരാമർശം. അമേരിക്കയും ചൈനയും തമ്മിലുള്ള അസ്വാരസ്യങ്ങൾ പരിഹരിക്കുന്നതിനായി എല്ലാവിധ ശ്രമങ്ങളും നടത്തുമെന്നും യുഎസ് പ്രസിഡന്റ് ജോ ബൈഡനുമായുള്ള കൂടിക്കാഴ്ചയ്ക്ക് ശേഷം ഷി ജിൻ പിംഗ് പറഞ്ഞു.
കൂടിക്കാഴ്ചയ്ക്കിടെ സിൻജിയാങ്, ടിബറ്റ്, ഹോങ്കോംഗ് എന്നിവിടങ്ങളിൽ ചൈന നടത്തുന്ന മനുഷ്യാവകാശ ലംഘനങ്ങൾ ചൂണ്ടിക്കാട്ടിയ ബൈഡൻ, വിഷയത്തിൽ ആശങ്കയും അറിയിച്ചു. ഒരു രാജ്യത്തിന്റെ അവകാശങ്ങളെ മാനിക്കുക എന്നത് എല്ലാ രാജ്യങ്ങളുടേയും ഉത്തരവാദിത്തമാണെന്നും വൈറ്റ് ഹൗസ് പുറത്ത് വിട്ട പ്രസ്താവനയിൽ പറയുന്നു.
ഇതിന് മറുപടിയായാണ് ചൈന എല്ലാ രാജ്യങ്ങളുടേയും സ്വാതന്ത്ര്യത്തേയും മനുഷ്യാവകാശങ്ങളേയും മാനിക്കുന്നുണ്ടെന്ന് പറഞ്ഞത്. ” പീപ്പിൾസ് റിപ്പബ്ലിക്ക് സ്ഥാപിതമായിട്ട് 70 വർഷം പിന്നിട്ടു. ഈ കാലത്തിനിടെ ചൈന മറ്റൊരു രാജ്യത്തെ പ്രകോപിപ്പിക്കുകയോ യുദ്ധത്തിന് പ്രേരിപ്പിക്കുകയോ ചെയ്തിട്ടില്ല. ഒരു ഇഞ്ച് ഭൂമി പോലും മറ്റൊരു രാജ്യത്തിന്റെ കയ്യിൽ നിന്ന് പിടിച്ചെടുക്കാൻ ചൈന ശ്രമിച്ചിട്ടില്ലെന്നും” ഷി ജിൻ പിംഗ് അവകാശപ്പെട്ടു.