ചെന്നൈ: തൃഷയ്‌ക്കെതിരായ അശ്ലീല പരാമർശത്തിൽ മാപ്പ് പറയില്ലെന്ന് വ്യക്തമാക്കി നടൻ മൻസൂർ അലി ഖാൻ. താൻ തെറ്റൊന്നും ചെയ്തിട്ടില്ലെന്നും അതിനാൽ മാപ്പ് പറയില്ലെന്നും മൻസൂർ പറഞ്ഞു. താര സംഘടനയായ നടികർ സംഘം മാപ്പ് പറയാൻ ആവശ്യപ്പെട്ടത് തന്നോട് വിശദാകരണം പോലും ചോദിക്കാൻ തയ്യാറാകാതെയാണെന്നും അതിനാൽ സംഘടന പുറത്തിറക്കിയ പത്രക്കുറിപ്പ പിൻവലിക്കണമെന്നും അദ്ദേഹം ആവശ്യപ്പെട്ടു. ഇല്ലാത്ത പക്ഷം നിയമനടപടി സ്വീകരിക്കുമെന്നും മൻസൂർ വാർത്താ സമ്മേളനത്തിൽ വ്യക്തമാക്കി.
സിനിമയിൽ നടക്കുന്ന കൊലപാതകങ്ങളും ബലാത്സംഗങ്ങളും യഥാർത്ഥമാണോ..ആരെങ്കിലും ആരെയെങ്കിലും കൊല്ലുകയോ ബലാത്സംഗം ചെയ്യുകയോ ചെയ്യുന്നുണ്ടോ.. പിന്നെ എന്ത് തെറ്റാണ് താൻ ചെയ്തത്. തെറ്റ്‌ചെയ്യാത്തതിനാൽ മാപ്പ് പറയില്ല. സിനിമ താരങ്ങളുടെ സംഘടനയായ നടികർ സംഘം തനിക്കെതിരെ പത്രക്കുറിപ്പ് ഇറക്കിയത് തെറ്റായിപ്പോയി. പത്രക്കുറിപ്പ് പുറത്തിറക്കിയത് തന്നോട് ഒരു വിശദീകരണം പോലും തേടാതെ. താര സംഘടനയുടെ മണ്ടത്തരം ഹിമാലയൻ മണ്ടത്തരം. നാല് മണിക്കൂറിനകം കുറിപ്പ് പിൻവലിച്ചില്ലെങ്കിൽ നിയമനടപടി സ്വീകരിക്കുമെന്നും മൻസൂർ അലി ഖാൻ വ്യക്തമാക്കി.
വിഷയത്തിൽ മാപ്പ് പറയില്ലെന്ന് മൻസൂർ അലിഖാൻ നേരത്തെ വ്യക്തമാക്കിയിരുന്നു. താൻ തമാശ രൂപേണയാണ് പരാമർശം നടത്തിയതെന്നായിരുന്നു വിവാദങ്ങൾക്ക് പിന്നാലെയുള്ള മൻസൂർ അലി ഖാന്റെ പ്രതികരണം. നിരവധി മുൻനിര നായികമാർക്കൊപ്പം അഭിനയിച്ചിട്ടുണ്ട്. അവർക്കെല്ലാം തന്റെ സ്വഭാവത്തെ കുറിച്ച് നന്നായി അറിയാം. അഭിമുഖത്തിൽ തമാശയായിട്ടായിരുന്നു താൻ മറുപടി നൽകിയത്. ഇപ്പോൾ നടക്കുന്ന ഭീഷണികൾക്ക് മുന്നിൽ വഴങ്ങുന്ന വ്യക്തിയല്ല താനെന്നും മൻസൂർ അലി ഖാൻ കഴിഞ്ഞദിവസം പറഞ്ഞു.
വിഷയത്തിൽ സ്വമേധയാ കെസെടുത്ത ദേശീയ വനിതാ കമ്മീഷൻ നിയമ നടപടി സ്വീകരിക്കാൻ ഡിജിപിയോട് നിർദ്ദേശിക്കുകയും ചെയ്തു. മൻസൂർ അലിഖാന്റെ പരാമർശത്തെ അപലപിച്ച കമ്മീഷൻ പരാമർശം സ്ത്രീകൾക്കെതിരായ അതിക്രമങ്ങളെ നിസാരവത്ക്കരിക്കുന്നതാണെന്നും നിരീക്ഷിച്ചു. നടിയും ദേശീയ വനിതാ കമ്മീഷൻ അംഗവുമായ ഖുശ്ബു മൻസൂർ അലിഖാനെ രൂക്ഷമായി വിമർശിച്ച് രംഗത്തുവന്നിരുന്നു. വിഷയത്തിൽ കമ്മീഷന്റെ ഭാഗത്ത് നിന്നും ശക്തമായ നടപടിയുണ്ടാകുമെന്ന് ഉറപ്പുനൽകുകയും ചെയ്തിരുന്നു. പിന്നാലെയാണ് കഴിഞ്ഞ ദിവസം ദേശീയ വനിതാ കമ്മീഷൻ സ്വമേധയാ കേസെടുത്തത്.
വിഷയത്തിൽ സിനിമ ലോകം ഒന്നടങ്കം തൃഷയ്‌ക്ക് പിന്തുണ അറിയിച്ചു. സംവിധായകൻ ലോകേഷ് കനകരാജാണ് ആദ്യം പിന്തുണയുമായി എത്തിയത്. പിന്നാലെ നടികർ സംഘവും നടിക്ക് പിന്തുണയുമായെത്തി. നടി മാളവിക, ഗായിക ചിന്മയി തുടങ്ങിയ പ്രമുഖരും തൃഷയ്‌ക്ക് പിന്തുണ അറിയിച്ച് പരസ്യപ്രതികരണവുമായി രംഗത്തുവന്നു.
