ഏകദിന ലോകകപ്പിലെ കലാശപ്പോരിൽ അടിതെറ്റിയെങ്കിലും ഇന്ത്യൻ ടീമിനെ നെഞ്ചോട് ചേർത്തുപിടിക്കുകയാണ് പ്രധാനമന്ത്രി നരേന്ദ്ര മോദി. ഇന്ത്യൻ ടീമിന്റെ തോൽവിയിൽ നിരവധി ആളുകൾ സമൂഹമാദ്ധ്യമങ്ങളിലടക്കം ടീമിനെയും താരങ്ങളെയും വിമർശിച്ചും അധിക്ഷേപിച്ചും രംഗത്തെത്തിയപ്പോൾ പ്രചോദനവുമായാണ് പ്രധാനമന്ത്രി ഇന്ത്യൻ താരങ്ങളെ കാണാൻ ഡ്രസ്സിംഗ് റൂമിൽ എത്തിയത്.
ഇന്ത്യൻ ക്യാപ്റ്റൻ രോഹിത് ശർമ്മ, വിരാട് കോലി, ടീമിന്റെ പരിശീലകൻ രാഹുൽ ദ്രാവിഡ് തുടങ്ങിയ താരങ്ങളെ പ്രധാനമന്ത്രി സന്ദർശിച്ചു. 10 മത്സരങ്ങളിൽ അപരാജിത പോരാട്ടം നടത്തിയാണ് ഇതുവരെ എത്തിയതെന്നും അത് വലിയ വിജയമാണെന്നും അദ്ദേഹം ചൂണ്ടിക്കാട്ടി. ലോകകപ്പിൽ ഏറ്റവുമധികം വിക്കറ്റുകൾ നേടിയ മുഹമ്മദ് ഷമിയെ നെഞ്ചോട് ചേർത്തുപിടിച്ച പ്രധാനമന്ത്രി അദ്ദേഹത്തിന്റെ പോരാട്ട വീര്യത്തെ അഭിനന്ദിക്കുകയും ചെയ്തു. ബുംറയോട് ഗുജറാത്തി സംസാരിക്കാറുണ്ടോയെന്നും അദ്ദേഹം ചോദിച്ചിരുന്നു. താരങ്ങളെയെല്ലാം ന്യൂഡൽഹിയിലേക്ക് ക്ഷണിച്ച ശേഷമാണ് പ്രധാനമന്ത്രി അവിടെ നിന്നും മടങ്ങിയത്.
PM with Team India pic.twitter.com/UJ1gYVd8Jv
— Aman Sharma (@AmanKayamHai_) November 21, 2023
“>
പ്രധാനമന്ത്രിയുടെ സന്ദർശനം ഇന്ത്യൻ ടീമും സമൂഹ മാദ്ധ്യമങ്ങളിലൂടെ പങ്കുവച്ചിരുന്നു. ഡ്രസ്സിംഗ് റൂമിൽ വന്ന് ഞങ്ങൾക്ക് പ്രചോദനം നൽകിയ പ്രധാനമന്ത്രിക്ക് നന്ദി. നമ്മൾ ഉറപ്പായും തിരിച്ചു വരുമെന്നും താരങ്ങൾ കുറിച്ചു.