അപകടങ്ങൾ പലതും കണ്ണിൽ കണ്ടാലും അതൊന്നും വകവയ്ക്കാതെ വീണ്ടും അത്തരം കാര്യങ്ങൾ ആവർത്തിക്കുന്നത് മനുഷ്യരുടെ സ്വഭാവമാണ്. ഇവിടെ തുപ്പരുതെന്ന് ഒരു പോസ്റ്റർ കണ്ടാൽ അവിടെ തന്നെ തുപ്പുന്ന ശീലമുള്ളവരാണ് നമുക്ക് ചുറ്റുമുള്ളത്. അതുപോലെ ഒരു പ്ലാറ്റ്ഫോമിൽ നിന്നും മറ്റൊരു പ്ലാറ്റ്ഫോമിലേക്ക് പോകണമെങ്കിൽ ലിഫ്റ്റ് അടക്കമുള്ള സംവിധാനങ്ങൾ ഉണ്ടെങ്കിലും ട്രെയിൻ ട്രാക്ക് മുറിച്ച് കടന്നില്ലെങ്കിൽ നമുക്ക് ഒരു സമാധാനവും കിട്ടാറില്ല. അങ്ങനെ ട്രെയിൻ ട്രാക്ക് മുറിച്ച് കടക്കുന്നതിനിടെ പണി കിട്ടിയ വയോധികനെ ജീവൻ പണയം വച്ച് രക്ഷിക്കുന്ന റെയിൽവേ സെക്യൂരിറ്റി ഗാർഡിന്റെ വീഡിയോയാണ് ഇപ്പോൾ വൈറലായിരിക്കുന്നത്.
സിസിടിവി ക്യാമറയിൽ പതിഞ്ഞ വീഡിയോയിൽ നിരവധി ആളുകൾ റെയിൽവേ ട്രാക്ക് മുറിച്ച് കടക്കുന്നത് കാണാം. ഇതിനിടയിൽ ഒരു വയോധികൻ ട്രാക്കിൽ നിന്നും പ്ലാറ്റ്ഫോമിലേക്ക് കയറാൻ പാടുപെടുമ്പോഴാണ് ഇതേ ട്രാക്കിലൂടെ സൂറത്ത്- ബാന്ദ്ര ടെർമിനസ് ഇന്റർസിറ്റി ട്രെയിൻ വരുന്നത്. ഭയന്നുപോയ വയോധികൻ ട്രാക്കിലേക്ക് തെന്നി വീഴുന്നതും വീഡിയോയിൽ കാണാം. ഇതോടെ ജീവൻ പണയം വച്ച് റെയിൽ സെക്യൂരിറ്റി ഗാർഡ് വയോധികനെ സഹായിക്കാൻ എത്തിയതോടെ വൻ ദുരന്തമാണ് ഒഴിവായത്. തുടർന്ന് ഇയാളെ സെക്യൂറ്റി ഗാർഡ് പ്ലാറ്റ്ഫോമിലേക്ക് കയറ്റുന്നതും വീഡിയോയിൽ കാണാം. വയോധികനിൽ നിന്നും പിഴ ഈടാക്കിയിട്ടുണ്ട്. വയോധികനെ രക്ഷിച്ച റെയിൽവേ ഗാർഡിന് ഇപ്പോൾ നിരവധി കൈയ്യടികളാണ് ലഭിക്കുന്നത്.
