ഛണ്ഡീഗഡ്: റെയിൽവേ ട്രാക്കിൽ ട്രക്ക് നിർത്തിയിട്ട് കടന്നു കളഞ്ഞ സംഭവത്തിൽ ഡ്രൈവർ പിടിയിൽ. ഇന്നലെ രാത്രിയോടെയാണ് സംഭവം. ലോക്കോ പൈലറ്റിന് വിവരം കിട്ടിയതിനാൽ വൻ അപകടമാണ് ഒഴിവായതെന്ന് പോലീസ് അറിയിച്ചു.
മദ്യപിച്ച് വാഹനമോടിച്ച ട്രക്ക് ഡ്രൈവർ, ലുധിയാന- ഡൽഹി റെയിൽവേ ട്രാക്കിൽ നിർത്തിയിടുകയായിരുന്നു. ട്രക്ക് റെയിൽവേ ട്രാക്കിൽ നിർത്തിയിട്ടിരിക്കുന്ന വിവരം നാട്ടുകാരാണ് റെയിൽവേ സുരക്ഷാ ഉദ്യോഗസ്ഥരെ അറിയിച്ചത്. തുടർന്ന് ലോക്കോ പൈലറ്റ് ട്രെയിനിന്റെ വേഗത കുറയ്ക്കുകയും ട്രക്കിൽ നിന്നും ഏതാനും മീറ്റർ അകലെയായി ട്രെയിൻ നിർത്തിയിടുകയും ചെയ്തു. ഇതോടെ തലനാരിഴയ്ക്കാണ് വൻ അപകടം ഒഴിവായത്.
ഏതാനും മണിക്കൂർക്ക് ശേഷം ട്രക്ക് മാറ്റിയതായും ഗതാഗതം പുന: സ്ഥാപിച്ചതായും റെയിൽവേ അധികൃതർ അറിയിച്ചു. സംഭവത്തിൽ കടന്നു കളയാൻ ശ്രമിച്ച ട്രക്ക് ഡ്രൈവറെ പോലീസ് അറസ്റ്റ് ചെയ്തു. വൈദ്യ പരിശോധനയിൽ ഇയാൾ മദ്യലഹരിയിലാണെന്നും കണ്ടെത്തി. സംഭവത്തിൽ കൂടുതൽ അന്വേഷണം നടത്തുമെന്ന് പോലീസ് അറിയിച്ചു.