ഡിജിറ്റൽ വായ്പകളിലേക്ക് ഉപയോക്താക്കളെ ആകർഷിക്കാൻ ഡാർക്ക് പാറ്റേണുകൾ ഉപയോഗിക്കുന്നുവെന്ന മുന്നറിയിപ്പുമായി ആർബിഐ. ഉപയോക്താക്കളെ ആകർഷിക്കുന്നതിനും തെറ്റിദ്ധരിപ്പിക്കുന്നതിനുമായി ഡിജിറ്റൽ വായ്പാ ദാതാക്കൾ ഡാർക്ക് പാറ്റേണുകൾ ഉപയോഗിച്ച് തട്ടിപ്പ് നടത്തുന്നുവെന്ന് ആർബിഐ ഡെപ്യൂട്ടി ഗവർണർ എം രാജേശ്വര റാവു അറിയിച്ചു. ഡിജിറ്റൽ പണമിടപാട്, വിപണിയിലെ അപകടസാധ്യത എന്നിവ സംബന്ധിച്ച റിസ്ക് മാനേജ്മെന്റ് ചട്ടക്കൂട് ആർബിഐ പരിശോധിച്ച് വരികയാണെന്നും ഡെപ്യൂട്ടി ഗവർണർ വ്യക്തമാക്കി.
ഓൺലൈൻ മുഖേന തെറ്റിദ്ധരിപ്പിക്കുന്ന തരത്തിലുള്ള വായ്പകൾ വാഗ്ദാനം ചെയ്യുന്നതിനാണ് ഡാർക്ക് പാറ്റേണുകൾ എന്ന ഡിജിറ്റർ ടെക്നിക് ഉപയോഗിക്കുന്നതെന്നും റാവൂ ചൂണ്ടിക്കാട്ടി. ഡിസൈൻ ഇന്റർഫേസുകളും മറ്റ് വിപണന തന്ത്രങ്ങളും ഉപയോഗിച്ചാണ് ഇൻസ്റ്റന്റ് ലോണെന്ന വ്യാജേന ഉയർന്ന പലിശ നിരക്കുള്ള ഇത്തരം വായ്പകൾ ഉപയോക്താക്കൾക്ക് നൽകുന്നത്. നിലവിലെ ടെക്-ബാങ്കിംഗ് ഇടപാടുകളിൽ സൈബർ തട്ടിപ്പുകൾക്ക് തടയിടുന്നതിനായി സുരക്ഷ ശക്തമാക്കണമെന്ന് ആർബിഐ ബാങ്കുകളോട് ആവശ്യപ്പെട്ടിട്ടുണ്ട്.
‘തട്ടിപ്പുകളും ഡാറ്റാ ചോർച്ചകളും മറ്റും വർദ്ധിച്ചു വരികയാണ്. അനധികൃത ആപ്പുകൾ, സ്വകാര്യത ലംഘിക്കൽ, ഡീപ്ഫേക്കുകൾ എന്നിങ്ങനെ നിരവധി സൈബർ ഭീഷണികൾ ഇന്ന് ഉപഭോക്താക്കൾ നേരിടുന്നുണ്ട്. ഉപയോക്താക്കളുടെ വിശ്വാസ്യത നിലനിർത്തുന്നതിനും ഇത്തരം സുരക്ഷാ ഭീഷണികളിൽ നിന്നും സംരക്ഷിക്കുന്നതിനും പരിശ്രമിക്കേണ്ടതുണ്ട്. ഉയർന്ന പലിശ നിരക്കിൽ 50,000 രൂപയിൽ താഴെയുള്ള ചെറുകിട വായ്പകളുടെ എണ്ണം കൂടുന്ന സാഹചര്യത്തിലാണ് നീക്കമെന്നും അദ്ദേഹം പറഞ്ഞു.
