മുംബൈ: ക്രിസ്തുമസിന് മുന്നോടിയായി യാത്രക്കാർക്ക് വമ്പൻ ഓഫറുമായി എയർ ഇന്ത്യ എക്സ്പ്രസ്. 30 ശതമാനം ഇളവാണ് എയർ ഇന്ത്യ ഇത്തവണ യാത്രക്കാർക്കായി ഒരുക്കിയിരിക്കുന്നത്. ആഭ്യന്തര, അന്താരാഷ്ട്ര സെക്ടറുകളിലും വിലക്കുറവ് ഉണ്ടായിരിക്കുമെന്ന് എയർ ഇന്ത്യ അറിയിച്ചിട്ടുണ്ട്.
ഡിസംബർ രണ്ട് മുതൽ അടുത്ത വർഷം മേയ് 30 വരെയാണ് യാത്രക്കാർക്ക് ഓഫർ പ്രഖ്യാപിച്ചിരിക്കുന്നത്. വിദ്യാർത്ഥികൾക്കും മുതിർന്ന പൗരന്മാർക്കും, സായുധസേനാ ഉദ്യോഗസ്ഥർക്കും പ്രത്യേക ഓഫറുകളും വെബ്സൈറ്റിലൂടെ ലഭ്യമാവും. ബെംഗളൂരു – കൊച്ചി, ബെംഗളൂരു – കണ്ണൂർ, ബെംഗളൂരു – മംഗളുരു, ബെംഗളൂരു – തിരുവനന്തപുരം, ചെന്നൈ – തിരുവനന്തപുരം, കണ്ണൂർ – തിരുവനന്തപുരം, ബെംഗളൂരു – തിരിച്ചറപ്പള്ളി ഉൾപ്പെടെയുള്ള റൂട്ടുകളിലാണ് ടിക്കറ്റ് വിലയ്ക്ക് ഇളവ് പ്രഖ്യാപിച്ചത്.
കമ്പനിയുടെ വെബ്സൈറ്റിലും മൊബൈൽ ആപ്ലിക്കേഷനിലും ലോഗിൻ ചെയ്തിട്ടുള്ള ഉപഭോക്താക്കൾക്ക് കൺവീനിയൻസ് ഫീസ് അടയ്ക്കേണ്ടതില്ല. കൂടാതെ എക്സ്പ്രസ് അഹെഡ് കോംപ്ലിമെന്ററി സേവനങ്ങളും ലഭ്യമാകുമെന്ന് എയർ ഇന്ത്യ അറിയിച്ചു.
