ഒരു മനുഷ്യന്റെ എല്ലാവിധ കാര്യങ്ങളും അറിയാൻ 12 അക്കങ്ങൾ അടങ്ങിയിട്ടുള്ള ആധാർ കാർഡ് മാത്രം പരിശോധിച്ചാൽ മതി. പേര്, വിലാസം, വിരലടയാളം, ജനന തീയതി എന്തിനേറെ പറയുന്നു രക്തഗ്രൂപ്പ് വരെ ആധാറിൽ അടങ്ങിയിട്ടുണ്ടെന്ന് ഏതൊരു സാധരണക്കാരനും അറിയാം. ആധാറിൽ കൊടുത്തിരിക്കുന്ന പല കാര്യങ്ങളും നമുക്ക് മാറ്റാൻ സാധിക്കുമെങ്കിലും ഈ രണ്ട് കാര്യങ്ങൾ നമ്മൾ വളരെ വളരെ ശ്രദ്ധയോടെ പൂരിപ്പിക്കേണ്ടതുണ്ട്. അറിയാം..
ജനന തീയതി
എല്ലാ ഇന്ത്യൻ പൗരന്മാർക്കും ആധാർ വളരെ പ്രധാനപ്പെട്ട രേഖയായി മാറിയിരിക്കുകയാണ്. ആധാറിൽ നമ്മൾ നൽകിയിട്ടുള്ള വിവരങ്ങളിൽ മേൽവിലാസം പോലുള്ള കാര്യങ്ങൾ ഇടയ്ക്കിടെ മാറ്റാൻ സാധിക്കും. എന്നാൽ ജനനതീയതി പോലുള്ള കാര്യങ്ങൾ പൂരിപ്പിക്കുമ്പോൾ പ്രത്യേകം ശ്രദ്ധിക്കേണ്ടതുണ്ട്. ഇത് ഇടയ്ക്കിടെ മാറ്റാൻ സാധിക്കില്ലെന്ന് മാത്രമല്ല പിന്നീട് തൊഴിലുകളുമായോ പരീക്ഷകളുമായോ ബന്ധപ്പെട്ട കാര്യങ്ങൾ വരുമ്പോൾ നിങ്ങൾക്ക് ജനനതീയതിയുടെ പേരിൽ പ്രയാസപ്പെടേണ്ടി വരും. കുട്ടികളെ സ്കൂളിൽ ചേർക്കുമ്പോൾ ഒരു ജനനതീയതിയും ആധാറിൽ മറ്റൊരു ജനനതീയതിയും കൊടുത്ത് എസ്എസ്എൽസി പരീക്ഷാ സമയത്ത് പിന്നീട് ജനന തീയതി മാറ്റാൻ നടക്കുന്ന പല സംഭവങ്ങളും നിരവധിയുണ്ടായിട്ടുണ്ട്. അതിനാൽ ആധാറിൽ തെറ്റായ ജനന തീയതി കൊടുക്കാതിരിക്കാൻ പ്രത്യേകം ശ്രദ്ധിക്കുക.
പേര്
ജനനതീയതി പോലെ തന്നെ ശ്രദ്ധിക്കേണ്ട പ്രധാനപ്പെട്ട മറ്റൊരു കാര്യമാണ് ‘പേര്’. പേരിലെ ഇനീഷ്യലോ മുഴുവൻ പേരോ ഒഴിവാക്കിയായിരിക്കും പലരും പേര് ആധാറിൽ കൊടുക്കുക. ഇങ്ങനെ ചെയ്യുന്നതും നിങ്ങൾക്ക് പിന്നീട് ബുദ്ധിമുട്ടുകൾ വരുത്തുമെന്ന് ഓർക്കുക. പേര് ചേർക്കുമ്പോൾ അക്ഷരത്തെറ്റ് വരാതിരിക്കാൻ പ്രത്യേകം ശ്രദ്ധ ചെലുത്തുകയും വേണം. എല്ലാ ഔദ്യോഗിക രേഖകളിലും പേര് ഒരുപോലെ കൊടുക്കാനും കൃത്യമായി കൊടുക്കാനും പ്രത്യേകം ശ്രദ്ധിക്കുക. ഈ രണ്ട് കാര്യങ്ങൾ ഇടയ്ക്കിടെ മാറ്റാൻ ജനങ്ങൾ നിരവധി നടപടി ക്രമങ്ങൾ നേരിടേണ്ടി വരുന്നതിനാൽ കൃത്യമായി പരിശോധിച്ചതിനു ശേഷം മാത്രം രേഖകൾ പൂരിപ്പിക്കണമെന്നാണ് അധികൃതരുടെ നിർദ്ദേശം.
