ഇന്ന് നവംബർ 30. ഇന്ത്യ ജി20 അദ്ധ്യക്ഷ പദവി ഏറ്റെടുത്തിട്ട് ഇന്നേക്ക് ഒരു വർഷം. കഴിഞ്ഞ 365 ദിവസം കൊണ്ട് ആഗോളതലത്തിൽ സംഭവിച്ച മാറ്റങ്ങളും ഭാരതം വഹിച്ച പങ്കും പ്രശംസനീയമാണ്. “വസുധൈവ കുടുംബകം”- ഒരു ഭൂമി, ഒരു കുടുംബം, ഒരു ഭാവി എന്ന കാഴ്ചപ്പാടിനെ പ്രതിഫലിപ്പിക്കാനും പുനർനിർമ്മിക്കാനും പുനരുജ്ജീവിപ്പിക്കാനുമുള്ള ഒരു നിമിഷമാണിതെന്ന് പ്രധാനമന്ത്രി പറഞ്ഞു. കഴിഞ്ഞ ഒരു വർഷം സംഭവിച്ച മാറ്റങ്ങളെ കുറിച്ച് പ്രധാനമന്ത്രി എഴുതിയ കുറിപ്പിന്റെ പ്രസക്ത ഭാഗങ്ങൾ ഇതാ..
എന്താണ് നമ്മെ ഭിന്നിപ്പിക്കുന്നത് എന്നതിലുപരി നമ്മെ ഒന്നിപ്പിക്കുന്നത് എന്താണെന്ന് ലോകത്തെ ഓർമ്മിപ്പിക്കുകയാണ് ഇന്ത്യയുടെ ലക്ഷ്യം. ഏറെ വെല്ലുവിളികളും പ്രതിസന്ധികളും നിറഞ്ഞ സമയത്താണ് ഇന്ത്യ ജി20 അദ്ധ്യക്ഷ പദവി ഏറ്റെടുത്തത്. കൊറോണ മഹാമാരിയിൽ നിന്നുള്ള വീണ്ടെടുക്കൽ, ഉയർന്നുവരുന്ന കാലാവസ്ഥാ ഭീഷണികൾ, സാമ്പത്തിക അസ്ഥിരത, വികസ്വര രാജ്യങ്ങളിലെ കടബാധ്യത തുടങ്ങി നിരവധി പ്രശ്നങ്ങളായിരുന്നു അദ്ധ്യക്ഷ പദവി ഏറ്റെടുത്തപ്പോൾ ഇന്ത്യക്ക് മുന്നിലുണ്ടായിരുന്നത്. നേരത്തെ പുരോഗതിയുടെ മാനദണ്ഡം ജിഡിപിയെ കേന്ദ്രീകരിച്ച് മാത്രമായിരുന്നുവെങ്കിൽ ഇന്ന് മനുഷ്യ കേന്ദ്രീകൃതമായ പുരോഗതിയിലേക്കുള്ള ബദൽ മാർഗം ലോകത്തിന് നൽകാൻ ഇന്ത്യക്കായി.
എല്ലാവരെയും ഉൾക്കൊള്ളുന്നതും പ്രവർത്തന അധിഷ്ഠിതവുമാണ് ഇന്ത്യയുടെ ജി20 അദ്ധ്യക്ഷപദവി. ഭാരതത്തിന്റെ പ്രതിബദ്ധതയുടെ സാക്ഷ്യപത്രമാണ് ജി20 അംഗങ്ങൾ ഐകകണ്ഠ്യേന പാസാക്കിയ ന്യൂഡൽഹി ലീഡേഴ്സ് ഡിക്ലറേഷൻ (NDLD). ജി20-യിൽ ആഫ്രിക്കൻ യൂണിയനെ ഉൾപ്പെടുത്തിയത് 55 ആഫ്രിക്കൻ രാജ്യങ്ങളെ സമന്വയിപ്പിക്കാനായി. ഇതുവഴി ആഗോള ജനസംഖ്യയുടെ 80 ശതമാനവും ജി20 ഗ്രൂപ്പിൽ ഉൾപ്പെടുത്താനായി. ആഗോള വെല്ലുവിളികളെയും അവസരങ്ങളെയും കൃത്യമായി മനസിലാക്കാനും പരിഹാര മാർഗങ്ങൾ ചർച്ച ചെയ്യാനും ജി20 അദ്ധ്യക്ഷ പദവിയിലൂടെ സാധിച്ചു.
ബഹുമുഖത്വത്തിന്റെ പുത്തൻ ഉദയമാണ് രണ്ട് എഡിഷനുകളിലായി ഇന്ത്യ നടത്തിയ “വോയ്സ് ഓഫ് ദി ഗ്ലോബൽ സൗത്ത് സമ്മിറ്റ്”. ആഗോള വ്യവഹാരത്തിൽ വികസ്വര രാജ്യങ്ങൾ വഹിക്കുന്ന പങ്കിനെ തുറന്നുകാട്ടാൻ ലഭിച്ച വേദിയായിരുന്നു അത്. ജനങ്ങളുടെ പങ്കാളിത്തം ഉറപ്പാക്കി ജി20 അദ്ധ്യക്ഷപദവിയെ ജനകീയമാക്കാനും ഇന്ത്യക്കായി. 140 കോടി ജനങ്ങളാണ് ജി20-യുടെ ഭാഗമായത്. ആരോഗ്യം, വിദ്യാഭ്യാസം, ലിംഗസമത്വം എന്നിവയുൾപ്പെടയുള്ള പരസ്പര ബന്ധിതമായ വിഷയങ്ങൾ ചർച്ച ചെയ്തു. പുരോഗതിയിലേക്ക് നയിക്കുന്ന പ്രധാന ഘടകം ഡിജിറ്റൽ പബ്ലിക് ഇൻഫ്രാസ്ട്രക്ചർ (ഡിപിഐ) ആണെന്ന് ലോകത്തെ അറിയിക്കാൻ ഭാരതത്തിനായി. ആധാർ, യുപിഐ, ഡിജിലോക്കർ ഫസ്റ്റ്-ഹാൻഡ് തുടങ്ങിയ ഡിജിറ്റൽ നവീകരണങ്ങളുടെ വിപ്ലവകരമായ സംവിധാനങ്ങൾ ആഗോള ഡിജിറ്റൽ മേഖലയിൽ തന്നെ വൻ മാറ്റത്തിന് കാരണമായി.
ഭൂമിയെ സംരക്ഷിക്കുന്നതിനായി “ഹരിത വികസന ഉടമ്പടി” ആവിഷ്കരിച്ചു. ഭൂമിയ്ക്ക് ദോഷം ചെയ്യാത്ത രീതിയിലുള്ള വികസനവും പ്രകൃതി സൗഹൃദമായ നിർമ്മാണ പ്രവർത്തനങ്ങളും അനിവര്യമാണെന്ന് ലോകം തിരിച്ചറിഞ്ഞു. 2030-ഓടെ ആഗോള പുനരുപയോഗ ഊർജ്ജ ശേഷിയിൽ മൂന്നിരട്ടി വർദ്ധനവുണ്ടാവണമെന്ന് ജി20 പ്രഖ്യാപനത്തിൽ പറയുന്നു. സ്ത്രീ ശാക്തീകരണത്തിനായി വർക്കിംഗ് ഗ്രൂപ്പുകളെ രൂപീകരിച്ചു. ഇന്ത്യൻ പാർലമെന്റിലും സംസ്ഥാന നിയമസഭകളിലെയും സീറ്റുകളിൽ മൂന്നിലൊന്ന് സ്ത്രീകൾക്കായി സംവരണം ചെയ്യുന്ന വനിതാ സംവരണ ബില്ലും യാഥാർത്ഥ്യമായത് ജി20 അദ്ധ്യക്ഷ പദവി ഏറ്റെടുത്ത സമയത്താണ്. സ്ത്രീകൾ നയിക്കുന്ന വികസനത്തോടുള്ള പ്രതിബദ്ധതയാണ് ഇതിലൂടെ വ്യക്തമാക്കുന്നത്. കഴിഞ്ഞ 365 ദിവസത്തിനിടെ 87 കാര്യങ്ങളിൽ ഫലം കണ്ടു, 18 വിഷയങ്ങൾ പുരോഗതി കൈവരിക്കുന്നുവെന്നത് അഭിമാനകരമാണ്. മുൻകാലങ്ങളെ അപേക്ഷിച്ച് വൻ മുന്നേറ്റമാണ് സംഭവിച്ചത്.
ഭൗമരാഷ്ട്രീയ പ്രശ്നങ്ങളെക്കുറിച്ചും സാമ്പത്തിക വളർച്ചയിലും വികസനത്തിലും അവയുടെ സ്വാധീനത്തെക്കുറിച്ചും ഇന്ത്യ നിരവധി ചർച്ചകൾ നയിച്ചു. ഭീകരവാദത്തെ അംഗീകരിക്കാനാവില്ല. സഹിഷ്ണുതയില്ലാത്ത നയത്തിലൂടെ നാം ഇതിനെ അഭിമുഖീകരിക്കണം. ശത്രുതയ്ക്കെതിരെയും ഭീകരതയ്ക്കെതിരെയും പോരാടണം. എന്നാൽ ഇത് യുദ്ധത്തിന്റെ കാലഘട്ടമല്ലെന്ന് ആവർത്തിക്കുകയും വേണം. ജി20 അദ്ധ്യക്ഷ പദവി കാലത്ത് ഇന്ത്യ കൈവരിച്ച അസാധാരണമായ നേട്ടങ്ങളിൽ ഞാൻ സന്തുഷ്ഠനാണ്. ബഹുമുഖത്വത്തെ പുനരുജ്ജീവിപ്പിക്കാനായി, ആഗോള ദക്ഷിണേന്ത്യയുടെ ശബ്ദം ഉയർത്തി, വികസനത്തിന് നേതൃത്വം നൽകി, എല്ലായിടത്തും സ്ത്രീ ശാക്തീകരണത്തിനായി പോരാടി. ഭൂമിക്കും ഭൂമിയിലെ ആളുകൾക്കും സമാധാനത്തിനും സമൃദ്ധിക്കും വേണ്ടിയുള്ള കൂട്ടായ നടപടികൾ വരും വർഷങ്ങളിൽ പ്രതിധ്വനിക്കും എന്ന ബോധ്യത്തോടെയാണ് ജി20 അദ്ധ്യക്ഷപദവി ബ്രസീലിന് കൈമാറിയത്.-പ്രധാനമന്ത്രി കുറിച്ചു.
