തിരുവനന്തപുരം: ഹിന്ദുധർമ്മ പരിഷത്തിന്റെ ആഭിമുഖ്യത്തിലുള്ള 12-ാമത് അനന്തപുരി ഹിന്ദു മഹാസമ്മേളനത്തിന് 2024 ജനുവരി ആറിന് തിരിതെളിയും. തിരുവനന്തപുരം പുത്തിരിക്കണ്ടം മൈതാനത്തെ സ്വാമി സത്യാനന്ദ സരസ്വതി നഗറിൽ ജനുവരി 6 മുതൽ 11 വരെയാണ് 2024ലെ ഹിന്ദുമഹാ സമ്മേളനം നടക്കുക.
സനാതന ധർമ്മം എന്റെ അഭിമാനമാണ്, എന്റെ ആചാരവും അവകാശവുമാണ് എന്നതാണ് ഇത്തവണത്തെ ആദർശ സൂക്തം. ആദ്ധ്യാത്മിക, സാംസ്കാരിക, കലാ സാഹിത്യ രംഗത്തെ പ്രമുഖരാണ് മാർഗനിർദ്ദേശങ്ങൾ നൽകുക. ഇതിന്റെ ഭാഗമായി 5 ദിവസത്തെ രഥയാത്രയും, അയ്യപ്പ ആഴിപൂജയും, വിശ്വ മംഗള മഹാഗണപതി ഹോമവും നടത്തും.
കൂടാതെ ദിവസവും പ്രത്യേക സെമിനാറുകളും, കേരളീയ കലകളും, പൊതുയോഗങ്ങളും സംഘടിപ്പിച്ചിട്ടുണ്ട്. അതേസമയം ഹിന്ദു മഹാസമ്മേളനത്തിന് മുന്നോടിയായി, സ്വാഗത സംഘം രൂപീകരണ യോഗം ഇന്ന് നടക്കും.