ന്യൂഡൽഹി: കെനിയൻ പ്രസിഡന്റ് ഡോ. വില്യം സമോയി റൂട്ടോ ഇന്ത്യ സന്ദർശിക്കുമെന്ന് വിദേശകാര്യമന്ത്രാലയം. രാഷ്ട്രപതി ദ്രൗപതി മുർമുവിന്റെ ക്ഷണപ്രകാരമാണ് അദ്ദേഹം ഇന്ത്യ സന്ദർശിക്കുന്നത്. ഡിസംബർ 4 മുതൽ 6 വരെയാണ് അദ്ദേഹത്തിന്റെ സന്ദർശനം. ഒരു ഉന്നതതല ഉദ്യോഗസ്ഥ സംഘവും അദ്ദേഹത്തെ ഇന്ത്യൻ സന്ദർശനത്തിൽ അനുഗമിക്കും. പ്രസിഡന്റായതിന് ശേഷമുള്ള വില്യം റൂട്ടോയുടെ ആദ്യ ഇന്ത്യാ സന്ദർശനമാണിത്.
രാഷ്ട്രപതി ഭവനിൽ അദ്ദേഹത്തിന് ആചാരപരമായ സ്വീകരണം നൽകും. രാഷ്ട്രപതി മുർമുവുമായും പ്രധാനമന്ത്രി നരേന്ദ്ര മോദിയുമായും അദ്ദേഹം കൂടിക്കാഴ്ച നടത്തും. മോദി -റൂട്ടോ കൂടിക്കാഴ്ചയിൽ ഇരു രാജ്യങ്ങളും തമ്മിലുള്ള ചർച്ചയിൽ ആഗോള വിഷയങ്ങളും ഉഭയകക്ഷി വിഷയങ്ങളും ചർച്ചയാകുമെന്നാണ് കരുതുന്നത്. പ്രസിഡന്റ് റൂട്ടോയ്ക്ക് രാഷ്ട്രപതി വിരുന്ന് സംഘടിപ്പിക്കുമെന്ന് മന്ത്രാലയം അറിയിച്ചു.
